Tella-d yiwet n temsizzelt n ufran n ssut akken ad yebdu usenfar n usisleg n usaru “L’Opium et le baton” ɣer tmaziɣt akken i d-as-id-ibarreḥ yakan Mass Samir Ait belkacem deg yiwet n tdiwennit i Uɣmis n yimaziɣen. Leswat ara d-yifriren d tid ara yettunefken i yiwudam i d-yuraren deg usaru. Teḍra-d temsizzelt tasebḥit n wass n 21 deg unbir-agi deg-i deg Uxxam n yidles Mulud Mɛemmeri n Tizi uzzu. I usmekti kan, asenfar-agi, yella-d ddaw n leɛnaya n Tneɣlaft n yidles d umaray amatu n Usqamu unnig n timuzɣa d ONDA i lmendad n meyya n yiseggasen ɣef tlalit n umusnaw i d-yuran adlis i yuɣalen d asaru i d-yessufeɣ Ahmed Rachedi s tutlayt n teɛrabt. Ass-a, ad yuɣal usaru s tutlayt n tmaziɣt akken i t-yessarem umussnaw ameqqran Mulud Mɛemmri. Ma d imtekkiyen i d-yusan s ṭṭaqa i wakken ad tekkin di temsizzelt, mxallafen di leɛmer: llan wid meqqren akken, llan daɣen yigurdan akken i d-yenna Mass Ait Belkacem : “igurdan d azekka nneɣ , yal yiwen yefka-d taɣuct-is syin akkin ad ffɣen igemmaḍ n temsizzelt akken ad yebdu usenfar”. Nesteqsa-d yiwen seg wid yettikkan di temsizzelt ɣef yisenfaren yecban wigi yenna-d : “ D ayen yessefraḥen imi nettwali tutlayt-nneɣ tekcem di taɣulin yecban tigi, akken daɣen d araz ara as-yuɣalen i umussnaw “ . Tettkemmil temsizzelt imi mazal ad tili di Bgayet akked Tubiret.
S. Y.