“Ad teẓreḍ i ixeddem usexser mi ara yaγ amekkan di tmussni.’’ I as-yenna winna. Tewweḍ teswiεt di Γerdaya armi Imẓabiyen ugin-asen i warraw-nsen akken ad uγalen γer uγerbaz. D acu yessawḍen tagnit ad tluγ akka ? Sebbat mačči d ayen i ixuṣṣen. Acu kan ayen i asen-yeḍran i yinelmaden imẓabiyen deg uγerbaz aseggas iεeddan, yugar-tent akk. Σlaḥsab n Mass Khoudir BABAZ, yiwen seg tseqamut yetabaεen tidyanin n Γerdaya, yenna-d :’’ iselmaden aεraben kkaten u tekksen sser γef yinelmaden imẓabiyen deg uγerbaz. Ugin ad ten-sseγren, u qqaren-asen ad kksen llebsa-nni-nsen. Am wakken, di&gamma,; i asen-ssenqasen di lqima imi nutni ṭṭfen di « lmedheb ibaḍi mačči di lmalaki.’’ Ihi, mebεed imi d-ḥebsen ilindi yinelmaden seg uγerbaz γef demma n wanect-agi, dγa, aseggas-a d imawlan-nsen i d-yekkren ad ṭṭfen amekkan-nsen deg useḥbes γef leqraya. Ugin ad ten-ceyyεen γer lakul : ssuturen deg yimḍebbren akken ad d-beddlen iselmaden-nni aεraben s yiselmaden imẓabiyen. Ssawḍen armi as-nnan aql-aγ da ad nesγer baṭel mebla lexlas. Aṭas n tmesbaniyin i yeḍran aseggas iεeddan sγur Imẓabiyen meεna tamsalt mazal-itt akken tella i teqqim imi tella tama i yeṭṭfen asafu, ladγa, imṭerfiyen-agi isalafiyen. Wigi, ččuren d lkerh n wiyaḍ, d times n ddaw walim : wwḍen ffγen-d γer yiberdan i wakken ad ḥettmen Imẓabiyen ad beddlen tamurt imi εlaḥsab-nsen d iεdawen n lislam. Tiktiwin am tigi, mačči kan deg uγerbaz n Γerdaya ay llant. Acḥal n tikkal ay nesla i yinelmaden qqaren-d :’’ ur neqqar ara taglizit axaṭer asmi ara nemmet εezrayen s taεrabt ara aγ-d-yemmeslay. Ur neqqar ara tarumit axaṭer d tameslayt n lkuffar.’’ Zi&gamma,; ur yeḍlim Dilem mi as-d-yerra i Djabellah γef tmaziγt, yura-d (ilaq ad nettaru tamaziγt s taεrabt u ad tt-nettmeslay s taεrabt). Awalen n yinelmaden, ur ten-lmiden ara kan akka weḥd-sen. Leqqmen-ten axaṭer llan yiselmaden i asen-igan iγisan i wallaγen-nsen. Acḥal n tikkal i asen-nesla i yiselmaden qqaren i yinelmaden-nsen, ayagi :’’lukan ad ẓreγ yella umasiḥi gar-awen, ad t-ssufγeγ tura.’’ Neγ wiyaḍ mi ara asen-inin :’’imawlan ur nettẓalla ara, ad ten-tečč ğahennama, ur uklalen ara ad ten-tqaddrem.’’ D acu ara d-ffγen yinelmaden yecban wigi ? Ad d-ffγen ugaren iselmaden-nsen, akken qqaren !
Hocine.M