Si 29 ar 31 di tuber iεeddan, teḍra-d yiwen n temlilit tusnawt γef Kateb Yacine deg uxxam n yidles Lmulud At Mεemmer n temdint n Tizi Uzzu. Deg leqdec i d-heggan i lmend n waya, ad naf : timsikent d isaragen i d-wwin iselmaden n tesdawiyin. Asarag yeṭṭfen lwelha s waṭas, εlaḥsab n wid iḥedren, d winna i d-yewwi Mass Chemakh : asarag anda i d-yemmeslay γef ‘’Kateb Yacine akked temsalt n tmaziγt’’. Mass Chemakh yessmekta-d d akken Kateb Yacine yeḥḍer i temlilit n MCB deg Yiεekkuren. Yerra timezgunin-is γer tlata n tutlayin (tamaziγt, tafransist akked taεrabt n Lezzayer). Amek wakken i as-isemma i mmi-s’’Amaziγ’’. I usmektu, ilul Kateb Yacine deg useggas 1929 di Qsenṭina. Yeḥḍer i temsbaniyin-nni n 1945. Ungal-is amezwaru ‘’Nedjma’’ yettwasnen aṭas u yis-s i imechur, yeffeγ-d deg useggas n 1956.Teḍra-d temlilit-agi di Tizi Uzzu imi ur ṣsawḍen ara ad tt-xedmen deg yiwet n tama n tmurt n Lezzayer, yal tikelt d acu n uεewwiq i asen-d-ttafen i wid i tt-id-yettheggin. Daymi i as-qqaren :’’ayen ẓzayen γef tamawin-nniḍen, fessus γef Tizi Uzzu.’’
Hocine. M