Ulac win ur neẓri dakken tiftisin n Bgayet, seg Ssuq Letnin alama d Bulimaṭ, uɣalent deg teɣzi n unebdu-a i iteddun ad ifak, d inagan n tal tigawt ama telha neɣ texser. Nuɣal nwala mačči ala asuččef seg uqebli ay d-iceqqun imerriyen (neɣ yif ad d-nini iẓewwaren), wanag ula d iswan nniḍen nuḥen deg yiqerruyen. Deg wannect-a yakk, d Abrid aɣelnaw wis 9, ay d asentel. Seg Lberǧ n Mira alama d Bgayet, ladɣa deg ussan n tɣimit, abrid yettemxudnuq alami d iri. Cehdent wallen n yinehharen ed yimezdaɣ mara ẓerrent yal uṭṭun n uklas (immatriculation). Tiplakin-nni merra i yuggten, ala 19, 34, 28, 05, 04, 43, 25, atg… Ayen i ijebden awellih-nneɣ mačči d tikeryas, wanag d ayen qeddcen wid i d-irezzun seg tal tawilayt n tmurt. L. M. d anagi iḥeḍren n yiwen n usayes (scène) i d-yellan tikkelt iɛeddan deg wadeg mu ssawalen « carrière » gar Melbu ed Zyama Mensuriya ; Anida kra n terbaɛt n yilemẓiyen ara ilin usan-d seg twilayin nniḍen, sḥebsen takerrust-nsen leǧwahi n tmeddit, ldin tiwwura d ṭṭiqan sdat n ubrid, la ceṭṭḥen sekren deg tlemmast n ubrid i ccna mu serrḥen almi dayen kan. Dɣa din, kra n yimezdaɣ n temnaḍt-nni lfan-d ɣur-sen telfen-iten. Ad nefhem seg waya dakken imeḍqan-a n tmerrit ttwargalen i twaculin ma bɣant ad tent-yewwet din ubeḥri asemmaḍ. Ababat s twacult, d azref-is ad yessuter leqder xersum deg yimeḍqan am widak. Win yebɣan tissit n yiɣisem (alcool) – d aberrani neɣ seg-neɣ – yewwi-d fell-as war aɛenni ad yerzu ɣer yimukan i yemuggen i wayen-nni, mačči ad ihewwel asaɛdi ad yernu tawennaḍt. Skud neẓra belli yiwen ur tecqi taluft n ugama. Win ara ak-yasun deg tizzegzewt i yettcabin tamsunt (lǧenna), ad tt-yeǧǧ tettak anzi i wahes (jahennama) s tqerɛatin n tbira akked yiḍumman nniḍen. Rnu ɣer-s, aya d ayen i d-iẓuɣɣuren isehwa ineqqen (accidents mortels) deg yal akud deg yiberdan. Mara yili yiwen yetturar s tkerrust-is seg uskar syin ad teḍru twaɣit, dɣa ad yeddu d asfel win yellan aɣarim (civilisé). Ɣef waya ihi, a win yufan ad nettmuqulut ulama tikwal ɣer tigawin i yettmaggan gar-aneɣ, akken ur nɣeṭṭel azref n twennaḍt ed ugama.
Mhenni Xalifi