Tasebḥit n wass n 06 ctember 2014, tella-d tulya tunsibt n tezrigt tis 05 n tfaska Taγuri s wurar, deg wexxam n yedles n Lmulud At Mεemmar n temdint n Tizi-Wezzu, s leḥdur n uselway n wesqqamu aγarfan n ugarzu n Tizi-Wezzu mass Ḥusin Harun, anemhal n yedles Weld Σli Lhadi, akked twacult n yedles d ttrebga, akken ifursent deqs n twaculin tagnit anda id-wwin tarwa-nsen akken asen-d-aγen idlisen. Imawlan n yinelmaden ḥedren s tuget tafaska-agi Taγuri s Wurar, i yellan temgarad γef tid yezrin, imi aseggas-a yella-d umaynut, anda id-skecmen yiwet n terkkent yesεan azal aṭas, taggi d tarkkent n tusna. Imḍebren n tfaska-agi jarden yiwen n wahil wessiεen u d amesbaγur, ara yeddun γef teγzi n 15 wussan, u yebḍan γef aṭas n yaḥricen, akken ad-ṣiwḍen ad-sqarben adlis γer yemdanen s lεamur yemgaraden xarṣum arac imecṭaḥ, imi aqcic yeqqaren d argaz n uzekka, d tafat n tudert, d tasarut swayes ara-ldint tewwura usirem. Timzikkent n yedlisen id-yesduri wexxan n yedles n Lmulud n At-Mεemmar ukkan deg-s 16 n tezrigin yemgaraden, id-yewwin idlisen yemgaraden i ittewxeṣen i warac imecṭaḥ, am tmucuha, tullisin id-ijebden lwelha i warac imecṭaḥ s yisental yemgaraden. Akken llan yedlisen s yisental niḍen, id-yettmeslayen γef umezruy n tegrewla tazzayrit i uressax n cfawat deg allaγen n warac akken at-id-affent tsutiwin id-iteddun, rnu idlisen n tusna i usebγes n yedles sumata. Akken ijarden deg ahil leqdic deqs n tmesbaniyin tidelsanin, ger-asent timliliyin γef amek id-yettili tira n tmucuha anda ara-d-yilli timzizelt n tmacahut yelhan di tfaska-agi, ara-d-yufraren deg wemḍiq amenzwaru. Akken ara d-yilli temzizelt γef weḍris n tγamsa s wayes ara rren tajmilt i uneγmas meẓẓiyen, syen ad-tilli tirza γer lemqarrat n yeγmisen di Lzzayer tamanaγt. Γer yidis n waya, llan isaragen γef uḥareb d usaḥbiber n warac mgal cwal d imarẓi, ara d-texdem massa Aγa Samya. Tamesbanit-agi ad-tennal deqs n temnaḍin niḍen n wakkal n Tizi-Wezzu, akken arac imectaḥ i izedγen deg idurar ad-sfaydin s wahil n tfaska-agi, iwesbγes-nsen di tγuri d tmusni. Amaynut di tezrigt n useggas-a, d axxam n leqbayel i yettwebnan deq wefrag n wexxam n yedles n Lmulud At-Mεemmar, id-yernan cbaḥa nezzah. Dγa deg-s ara d-tillint temliliyin ideg ara ad-wwin timucuha i warac sumata. Ula d arrac imuḍan i yellan d isbiṭarat ad-sfaydin s tfaska-agi, imi tisquma n warac imecṭaḥ d yemḍebren n wexxam n yedles n Lmulud n At-Mεemmar, ad-rrzun γer sbiṭarat yemgaraden yellan deg akkal n Tizi-Wezzu, am sbiṭar Neddir Muḥamed n Tizi-Wezzu, Iεeẓẓugen, Buγni, azeffun akken ad-sneqsen γef ulawen-nsen, asen-arren tajmilt s tikci n warazen ideg llan yedlisen n tmucuha, akken ad-ksen lxiq.
Islam Bessaci