Axxam-nna&gamma,; d yiwet n tzeqa id-yezgan deg wefrag n wexxam n yedles n lmulud n At-Mεemmar n Tizi-Wezzu, id-yesdurin aṭas n leqdicat i icuden γer yedles n teqbaylit, di tezrigt-agi tis 05 n tfaska » Taγuri s Wurar », wagi d asakwan n tmucuha.
Dγa si zman aqbur, di tmurt n leqbayel, d tameṭṭut id-yettawin timucuha i warac imecṭaḥ. Imi arac imecṭaḥ ḥemlen ad-slen i tmucuha yeččuren d lemεani, yal awal d tamsirt, γas akken tenḥaf tegnitt, maca lḥif iγleb-it usirem, γas ussan rrẓag-it maca tamacahut tefka-d tiẓẓeṭ i tudert.
Di ddurt tamenzut n tfaska-agi, tilawin n temnaḍt n Mεetqa, rrant arac imecṭaḥ γer zman aqbur, imi massa Naεman Dahbiya, Cebli Ğuher d Asmani Wardiya i yellan d iεeggalin n tiddukla tadelsant « Tigejdit » n temnaḍt n Mεetqa, wwint-d deqs n tmucuha.
Arac imecṭaḥ zzin-d am wegraw di tγarγart n wexxam, Nna Lğuhar tesawel tamacahut tenna: « Macahu! »
Arac imecṭaḥ rran-d : « Ahu! »
Nna Lğuher : « Tamacahut-iw ad telhu, ad awen-tehwu, ad tiγzif annect usaru ».
Dγa tebda tḥekku-d tamacahut n 02 n yiggujilen, id trebba yiwet n tmeṭṭut mbaεd lmut n yimawlan-nsen, anda i sen-tefka trebga yelhan akken ad-idiren di talwit. Arac imecṭaḥ kecmen di tmacahut, amzun dren tallit-nni, staqsayen, amek, ayen, melmi….atg
Dayen yesefraḥen aṭas, imi tamacahut mazal tesεa amḍiq-is di tmetti n wassa, γas akken εeddan acḥal n leqrun fell-as, yerna teddar ar ass-a s timawit d lebγi n tmeṭṭut.
Tamacahut ! d tajaddit, d tutlayt, d idles, acku ur yettak ḥedd afus n tallelt i win ur nettwassen ara. Yelha win ara yernun tamusni s ayen yeẓra yakan, yelha mi ara nissin idelsan ur nettwassen ara, tamusni ur tesεa ara tilas, temmal abrid i tikli, yis-s i d-tettban tafat, tcuba deg yiṭij ulac tiγilt ur yettaweḍ, yettarra-d asirem d tezmert.
Tamacahut yis-s i d-yekker yal aqbayli, d nettat i d aγerbaz id-irebban acḥal n tsutiwin. Tameṭṭut taqbaylit, segmi ara yali wass ur tessin asteεfu alamma d tameddit, mi ara s-d-zzin warraw-is γer yiri n lkanun, yettruḥ εeggu yettγimi-d laεfu.
Akken ara-tebdu tmacahut, arac ad ttmuqulen s imi n yemma-tesen naγ jida-nsen d acu ara d-tini, ad fehmen tamsirt akken iwata, ad tḥekku alamma iγleb-iten naddam, ma d nettat, γas teεya, imi d tamezwarut ara yakin u d taneggarut ara yeṭsen s wannect-a i tedder tsekla tamaziγt si tsuta γer tayeḍ.
Islam Bessaci