I lmend n taggara n tfaska tadelsant n tɣuri « lire en fête » ass nni n lǧemɛa 19 cutember 2014 deg uxxam n umezgun Kateb Yasin n Tizi Wezzu, banen-d wid d-yufraren deg temsizzelt n tira s tmaziɣt i wumi semman « libère ton imagination ». Arraz amenzu tewwi-t yiwet n tnelmadt n uɣerbaz alemmas Lɛerbi At Ɛmer n At-Yanni i yellan deg useggas wis 4. Tagi d Ǧennan Milisa ara nessenmer aṭas ɣef wazal d wul i s-tefka i tmaziɣt. Atan weḍris i d-tura i yimeɣriyen :
Taɣuri
Kra n yilmeẓyen tura ur ḥmilen ara taɣuri, ɣer-sen taɣuri mačči d asulef.
Taɣuri mačči kan deg yidis n leqraya deg uɣerbaz i tesɛa azal, tesɛa aṭas deg tudert n yal ass, tesɛa later deg yidles amatu n lɛebd yerna tettak-as lqima deg tmetti ideg yella. Taɣuri mačči kan deg waya i telha, yernu yis tzemreḍ ad tinigeḍ ar tmura nniḍen mebla ma tembawleḍ seg wemkan-ik. Deg kra n lweqt ad affeḍ adlis kter n uḥbib.
Yernu adlis d ayen i yettɣimin i lebda, d tamusni ur nettfak ara, mi ara teqqareḍ aṭas n ulfuyen ad tḥulfuḍ deg yiman-ik, deg kra n tikal ala taɣuri i yettɛawanen. Xas ma yella d ungal neɣ d ullis, neɣ d asefru, taɣuri tenfeɛ, ula d tutlayt, d tamaziɣt, d tafransist, d taglizit neɣ d taɛrabt, ad yishil ad tt-tḥefḍeḍ.
Taɣuri d armud igerzen i wallaɣ akked usɛeddi n lweqt. Iɛemmed daɣen ad tettuḍ iɣeblan ma llan, ad tuɣal ddunit ala tirga!
Ǧennan Milisa,
Aɣerbaz alemmas n At-Yanni