Ma yella yenna Lounis Ait Menguellet : Fṛeḥ a teqbaylit s wid i d-rebbaḍWid nɣant tismin ur ten yessawaḍ
Ɣelben tasebḥitzzemren i tmedditWwet afus a nṛuḥ
Aya ur yelli s ugacur. Ma yella yecna fell-as acḥal n tikkal Matoub Lounes, Zedek Mouloud, Amar Koubi, Kheloui Lounes d w aṭas nniḍen d anaẓur, aya ur yelli d agacur. Ma yella yenna fell-as umedyaz :
JSK nek d aqbayli I lmend n win nɣant tismin,S yisem-im nedheɣ ɣef tlelli yak ass-a iban-d mmi-m
diɣan ur yelli s-ugacur. JSk ɣef id newwi awal d tin n iseggasen n 70/80 asmi tsenni tilɣuɣa akked tiqbucin ta deffir ta ɣer uzrar n lɛez. JSK tin ɣef id newwi awal d tin id yefkan imyurar umi ur yezmir yiwen am Koli, Dali Rachid ,Dardar Rabah, Douadi Bachir,Iboud Miloud, Terzi Miloud, Koufi , Derridj, Baris Rachid , Anane , Aouis, Cerbah, Boubekeur, Abdeslam Kamel, Adghidh Rachid , Amara Mourad, Belehcene Ali, Menad , Meddane …d waṭas nniḍen. Imyurar irefden ssenǧaq n teqbaylit d asawen, yefkan lɛez i yidurar-nneɣ. JSK am akken neẓra tella d azamul n teqbaylit deg yeɛqel iman-is yal aqbayli anda i t-yuɣ lḥal. Yis i yezdi lqedd umsedrar lawan deg teẓmek fell-as, deg teẓmek ɣef tmeslayt-is, deg teẓmek ɣef idles-ines, deg teẓmek ɣer tmmagit-ines. Di lawan-nni JSK tella gar ifassen n wid i tt-ihemlen, yesnen ccan-is akked d azal-is am Abelkadr Khalef akked Mhiedine Khalef. JSK n immir tbedd ɣef llsas iṣaḥen , dayen-nni i yeǧǧan Ait Menguellet ad yini:
Win i d- ibedren adrar Ad yeglu s yisem-im Kra id urwen-t tuddar Hha-ten ɣef idis-im ur tɣelli–d ara Ad tt-beddeḍ lebda Wwet-t afus a nṛuḥ
Maca zrin wussan armi tuɣal, JSK yellan teṭṭef tiqucac, tetteḥnunnuf deg imillusen . Amillus deg teɣli JSK isem-is “ tadrimt”. Ass-a netawali-tt tuɣal d terbaɛt n menwala armi tuget n wid iḥamlen ddabex( neɣ adal) ur ssinen -ara ula d ismawen n yemyurar yetturaren ddaw ssenǧaq-ines taggara-agi. Rran ṣṣdid ɣef uzamul. Rran ddel ɣef uɣeddu n ttnefxa. Teɣli JSK. Xuḍi asmi yebɣa udabu a tt-yemḥu ( asmi is bedlen isem rran-tt d JET) idurar nedhen am yiwen JSK tella tella. Deg annar cnawi yessidiren ixf, yettakken abeḥri i turin, ihuzen ulawen cerrgent igenni : “ Maɛlic ma nemmut / argaz tameṭṭut, J . S. Imaziɣen ad teḥyu tamurt” neɣ “ yeǧǧa d lɛehd Ɛamiruc, Beṛka-aɣ temɛict n ddel”. Yal dduṛt tettemlil tassa d wayen turew deg annar n Oukil Remdane neɣ deg annar n umenzu n unbir akken ad inin nella u mazal a nili. Zrin wussan ur d yegri wayen ara d yegrin, JSK ḥfan waccaren-is. Teɣli d gar yir ifassen am akken is yenna Lounis : tettaɣeḍ teqbaylit/ mi ara d teɣli gar yir ifassen. Akka kečč diɣen: ayen ur zmiren ad hudden yexsimen hudden at wexxam. Ziɣ werǧin yeskaddeb wanzi is yeqqaren : ansi iɛedda lɛez ad iɛeddi ddel. Teḍṛa-tt yid-nneɣ am Mḥend bu tkerciwt! Wissen kan ma d yeḥnunneḍ Mhend bu twenza n wewṛaɣ?
Ait Slimane Hamid