Deg tegnit qerriḥit am ta, inelmaden ttafen tikwal kra n usellek deg Tnegga Taɣelnawt n Uqeddic (ANEM) akked Tmehla n Tigawt Tinmettit (DAS), ɣas ma yella akken i d-qqaren akk wid terza temsalt, 9000 n yidinaren i wayyur ur tesɛiḍ acu zemrent ad gent deg tmurt anda tamellalt txeddem 12 n yidinaren. Rnu ɣer-s, deg lawan-a gedged ideg nettaru aḍris-a werɛad i d-tefka Tmehla n Tigawt Tinmettit ulama d yiwen n umḍiq i Bgayet ɛlaḥsab win yettkelfen s tigawt tinmettit deg tɣiwant n Ayt-Smaɛel. Anect-a ihi, ad yeǧǧ ilemẓiyen n Bgayet merra ad ttraǧun qrib yegzem usirem-nsen, melmi ara ad zemren ad bdun aqeddic-nsen deg kra n tamiwin, taggara ad ten-tettxellis DAS neɣ d ANEM. « Xedmeɣ-d lekwaɣeḍ merra i ilaqen, aql-i ttraǧuɣ ad yili umḍiq i Bgayet sɣur DAS ». I aɣ-d-tenna yiwet n tesdawant. Seg tama tayeḍ, ula d ANEM taggara-a ulac ad yesbeyyen asellek-nni-ines i wid i d-yeffɣen seg tesdawit war axeddim, akken i d-teqqar yiwet seg tid i terza taluft. « Serseɣ akaram deg ANEM segmi sɛiɣ turagt, ar tura ur iyi-d-ssawlen ara. Qqaren-d ssenf-a yella kan i leprivi ». Deg teswiɛt-a deg llan at igerdasen, ama d arrac neɣ d teqcicin, nṭerren nezzeh. Liḥala n tudert ad tili d tin iweɛren ugar ɣef twacult n yal yiwen. Imi ababat, mara d-yeffeɣ mmi-s seg tesdawit, yettraǧu-t ad t-id-iɛin daɣ netta. Yefka-as yerna yefka-as almi dɣa i d-yewweḍ lawan anda ara as-d-yerr lxir ed leɛtab-is. Maca ugur iban d acu-t, d amahil-nni gedged i yuqan deg tmurt. Awi-d BAK neɣ sɛu agerdas, tikwal ulac aṭas deg-s amgerrad. Ladɣa mi iseggasen-a ineggura, mačči d aswir neɣ d tamussni s unamek n tzemmar n unelmad i yettɛeddayen mara yettḥebbir uneggara-a aqeddic, wanag d tamussni s unamek n cciɛa d lpistu, akked tjeɛɛalt daɣen ay d-yettawin tura azref-nsent. Yuɣ lḥal, d ayen i yeǧǧan arrac-nneɣ i yeɣɣaren deg uswir n BAK , yal mara ad t-id-awin neɣ ad t-xesren, ad ruḥen ad awin yid-sen azal n 20 n yimelyan d tajeɛɛalt, ad tt-gren din deg temsulta (la police).
Mhenni Xalifi