Ajemmaɛ n lmal n taddart n Tɣalaḍt meqqer, d aqḍar. Yal axxam yekki deg-s s yiwen n yixef neɣ ugar. Ilemẓiyen n taddart kessen s nnuba almend n umḍan (3) n waxfiwen i sɛant twaculin-nsen, ma ɣur-sent yiwen n yixef n lmal am taɣaḍt neɣ tixsi d tayessawt n yiwen n wass, ma ɣur-sent sin waxfiwen d tayessawt n sin wussan…atg.
Imeksawen iwimi d-tewweḍ nnuba ttnekkaren-d zik send tafrara, ttɛeddayen-d ɣef yixxamen si tama wadda alamma d tin n ufella n taddart. Yal axxam iɣef d-kkan berrun-d wa i taɣaḍt wayeḍ i txsi d warraw-is, dɣa netta ajemmaɛ skudmal yettimɣur, yettuɣal d aqḍar ma yelḥeq ɣer ubrid aneggaru nnig taddart, win akken yettawin srid s adrar. Yidir d Leḥlu d nnuba-nsen, yal yiwen iɛleq-d leǧbira n wusran anda i d-iger aɣrum aquran d kra n yiniɣman d zzit n uzemmur. Asɣar n uẓebbuj aquran deg ufus ayeffus yis-s sɛukkuzen neɣ ttwehhin ɣer wulli ad d-uɣalent s abrid ma ffɣent-t. Leḥlu yezwar sdat n uqḍar ma d Yidir d sin yiḍan ggran. Aydi yetturebban yeẓwer i tyessawt, yessen ad d-yerr izimer neɣ iɣid ma yeɛzel ɣef tqeḍɛit ma ulac ad t-izuɣer wuccen ɣer yiɣẓer ad t-yečč. Mi ara awḍen yimeksawen ɣer wadeg (4) anida ara ikes lmal ttserriḥen i tɣeṭṭen d wulli ad calint akken ad d-nadint ɣef yimɣi i iḥemmlent ad t-ččent. Rrbiɛ yegget acku deg tsemhuyt n tefsut i nella.
Imeksawen ad d-bedden mebɛid ad ttɛassan ma ur d-ixutel wuccen iɣid neɣ ma ur yewḥil ara yizimer deg yinijel. Kra yekka wass d tagi i d lxedma-nsen. Imdanen imeksawen ssexdamen allen-nsen deg tyessawt ma d iḍan imeksawen ssexdamen allen d wanzaren-nsen, seg wanda i d-tejba rriḥa n wuccen ad tt-mmagren s useglef. Biccuḥ, akken i s-qqaren warrac, yeḥṣa ur yezmir ara i uqjun dɣa ad yerwel d taffugt. Maca ala tuɣalin ara d-yuɣal, wissen kan melmi. Ad yeǧǧ alamma yeɣfel uydi ad yeḥweṣ izimer amecṭuḥ, ad t-yawi ɣer wabɛaḍ icudax ad t-yečč deg lisser. Ḥacama kan dayen wanag imeksawen d yiḍan ur yettɛedday ara fell-asen uzaylal, aɣfal ur t-ssinen, zgan dima ukin, kra yeḍran sdat-sen ɣef tiṭ-nsen.
Mi ara izeggen wass, Leḥlu d yiḍan ad d-dhun d tyessawt n lmal ma d Yidir ad iɛeddi ad d-iẓẓeg ulli alamma yeččur-d snat neɣ kradet n al ad d-ikkes aqurḍaɛ seg tenqelt ma yella neɣtegdurin n uyefki ad yu ifer-is. Liqa-nni tamellalt i d-iɣellin seg-sen ad isiqi snat ar kradet n tmiqwa seg-s ɣer daxel n uyefki-nni, wagi ad yuɣal yebbugla. Liqa n uqurḍaɛ ɣur-s tigawt takrurant (5) ɣef uyefki, tbeṭṭu-t ɣef sin n yiḥricen: aman d tedɣart (6). Tadɣart-agi neqqar-as abuglu. Lmal ad t-id-gren s asensu anda ara ixeggel deg laman ma d nutni ad d-ssersen ad ččen imekli. Ad d-qqimen i sin ad d-rnun yiḍan, ad d-refden leǧbirat-nsen ad d-kksen seg-sent tiḥedrin n uɣrum-nni aquran d zzit d man. Ttǧewwizen aɣrum s ubuglu i d-ihegga Yidir. Aseggri (7) dyini tibxsisin neɣ d tizwal ma wwant. Tameddit ad d-ssuffɣen lmal-nni seg yisensa, ad rnun cwiṭ n tyessawt alamma alaḥal ad yeɣli yiṭij imiren ad d-aɣen abrid n tuɣalin. Mi ara d-awḍen ɣer taddart, yal ixef yessen tawwurt n uxxam-is, yettarra srid ɣer din. Ma d azekka-nni ad d-tezzi nnuba n yimeksawen-nniḍen. Wissen n Mḥend, wissen n Mejɛer, wissen…
Aḍris-a d tukkist seg tullist «Tadukli » i d-yeddan deg ummud n tullisin
«Timsirin n yiḍ » n Malek HOUD