Ass-nni n lexmis 09 tuber, aɣerbaz alemmas Lɛerbi At Ɛmer n At Yanni, iga timlilit i deg ḥedren inelmaden, iselmaden, wid isedduyen tanemhalt, iɛeggalen n tdukliwin tidelsanin d wid n tɣiwant.
Wigi meṛṛa rzan-d i demma n usenmer d ubuddu n warrazen i yinelmaden ittekkin deg temsizzelt n tsekla tis 05 i d-thegga tnemhalt n yidles n tizi-wezzu gar 06 ar 19 cutember, umi qqaren “Taɣuri s Wurar”.
Tin yewwin arraz amenzu n temsizelt-agi d yiwet si tnelmadin n uɣerbaz agi n At Yanni. Tagi d Ǧennan Milisa, teqqar deg weswir wis 4 (4éme AM). Tettekki di temsizelt-agi umi fkan asentel “sebrireḥ ttexmam-ik”.
Yal anelmad yettekkin di temsizelt agi iwwi arraz n usebɣes. Am wakken tuɣal tejmilt s warrazen i tselmadin n tmaziɣt n uɣerbaz-agi.
Tella-d leqraya n yiwen weḍris i d-yesmektan meṛṛa aya, yerna tettuɛelleq tḥacit (banderole) i yerran azal i temlilit-agi.
Arraz-agi i d-tewwi Ǧennan Milisa, hdant d tajmilt i dda Mɛemmer Metref. Imi ad yezgu yedder s yedlisen yura, ad yedder di cfawat n uɣerbaz agi alemmas i deg yella d aselmad, s yin d anemhal.
Aɣerbaz alemmas “Lɛerbi At Ɛmer”