Akka i tra tmeẓla, simmal yettimɣur umḍan deg wadeg aḥeccran, simmal ara yettili ddiq ed uḥres. Deg tɣiwant n Ayt-Smaɛel, i d-yezgan s wazal n 60 n yikilumitren seg Bgayet, taddart n Tregragt i yellan d amḍiq n tɣiwant, attan tebda tettak-d ssmamat n temdint amzun ur d-tezga deg udrar ɛlay. Mara nili deg tmiṭ n temnaḍt-a ihi, ala zzhir n yikerrusen i isel umeẓẓuɣ, ed tziffurt n lmaẓuṭ i sraḥayen wanzaren, maca daɣen aṭas n umxudneq ed umcubbek deg ubrid i yessefqiɛen inehharen, deg wakud iruḥen seg tzeggant n wass alama d tameddit ladɣa. Tamentilt (sebba) tagaɛmirt n wanect-a imi ala yiwen n ubrid i zeddin tikeryas n yimezdaɣ n temnaḍin nniḍen n Ayt-Smaɛel i d-yettsubbun seg ufella, am wid n Tala Ɛṭa, Iɣil n Wulli, Burafaɛ ed Bumejber… Atg. « Skud d amḍiq n tɣiwant, imezdaɣ merra n Ayt Smaɛel zgan ɣur-s, maca lḥers yellan din yebda d tidet yesnulfay-d aɣilif. Ilaq yal wa ad ixemmem seg tama-s bac ur aɣ-d-yettlaqa lḥiḍ ». Ay d-yenna yiwen n yimezdaɣ n Ayt Smaɛel. Ilmend n waya, txemmem tɣiwant n Ayt Smaɛel ad theggi tadegt neɣ tiɣsert (station) tayednin i yifurguyen n tama n Tala Ɛṭa anda ara sṭarayen iɣermanen i ttɛebbin. Yettusemma ad ttukayen seg ubrid wayeḍ bac ad yenqes zzdiḥ ed umɛunẓel deg tlemmast n Tregragt.
Mhenni Xalifi