Deg tlemmast n ddurt yezrin yemmug zzerd (timecreḍt) deg taddart n Ayt Tɛisiwt i yettabaɛen taɣiwant n Ayt Smaɛel, tadayra n Yiderginen. Am yal aseggas, ansay-a (lɛada) yettak-as wakud ass bac ad yili, ɣas ma taggara-a yuɣal ugar d tanezzut (commerce) wala d taflest (liman) neɣ d ansay akken yettwali wallaɣ. Deg zik n wass n acer (lḥed) ihi, addad n tegnawt yella igerrez, imezdaɣ n temnaḍt-a kkren-d ad ṭṭfen abrid ɣer lǧamaɛ n Tizi n Lwali i d-isaḥen sdat n tqariwt anda tettwasfuggel tigawt-a. Wid iqedcen fell-as zlan agenduz ed tgenduzt, kraḍ n wakraren, ed sin n yiḥuliyen (iqerwacen), rnan heggan-d akk allalen i ilaqen am yickaren anda ara fesren tuna akked tecluḍin-nsent. Ssuma n yiwet n tunet n uksum tewweḍ alami d 130 n yidinaren, daymi ur bɣin aṭas yimezdaɣ nnan teɣlay maḍi, skud ma tuɣal ɣer tiɣit seg tḥuna ad teffeɣ fell-asen ugar. Maca, akken yebɣu yili, wid yuɣen tannumi ttaɣen-d tal tafaska-a uɣen-d amur-nsen. Wanag, ugur i d-ibanen ur t-tedra tuget: aksum n yiwen seg yixfawen – neɣ ugar – d win ihelken ziɣ. D ayen i yeǧǧan imezdaɣ n Ayt Tɛisiwt ed wid n temnaḍin n tama-as ad sḥissfen ugar mi yeffeɣ zzerd-nsen n useggas akken d ulac, ma neẓra belli aṭas n twaculin i iḍeggren tuna-nsen ɣer wuzur, tiyaḍ rran-d dderk ɣef yiman-nsent, ččant-t ɣas ma yuḍen . «Tasebḥit maḍi tessawel-iyi-d uletma bac ad iyi-d-tini ma yella mazal ur d-ɛuddeɣ ara atan fiḥel. Acku aksum n tunet-nsen ufan-tt yexser». I aɣ-d-tenna yiwet n tmeṭṭut. Aya yezraɛ s tidet asḥissef ɣur yemdanen i d-iɛudden almi yuzzel umeslay d tiṭelqi ɣef waṭas n wid ur nečči aksum-nni. Mara yili d tameɣra akka d tagaɛmirt i yerzan adrum s timmad-is (s lekmal-is), a win yufan akk ixfawen yettwarzan s tmezlit ad ɛeddin merra ɣef umezzay n lmal akken ad yili yiwen yettyeqqen s tdawsa n tesɣit, daɣen ad yeḍmen belli taddart ad temnaɛ seg yal aṭṭan.
Mhenni Xalifi