Asenfar n webrid muqren ara isduklen lwilayat n Tubirett lakekd Bgayet (Pénétrante Adjiba-Béjaïa) yewwi-d yides lfayda, yagi i yilmeẓyen n tama n At Ɛebbas yesduklen krad n tɣiwanin: Iɣil Ɛli, At Ṛẓin lakked Buǧlil. Asenfar-agi ṭfen cinwa (Crcc) lakked d yizdayriyen (Sapta) yebda i leḥu cwiṭ-cwiṭ deg tama-agi n’At Ɛebbas. Ixeddamen ttqeɛiden annar ansa ad iɛeddi webrid-agi muqren. D-acu, mači ɣef ayagi i nebɣa ad nemesslay. Ad nebder ayen i d t-yewwi usenfar-agi, imi ayen din n yilmeẓyen lakked d ibabaten n t’waculin yufa-n imukan, neɣ ixeddimen, deg usenfar-agi. Ɛla ḥsab akken iɣ-d nnan deg « la base de γie » yella-n deg tama n At Ṛẓin, azal n 132 n yilmeẓyezn yeṭfen imukan nsen deg uxeddim. Ayagi yessefraḥ aṭaṣ imezdaɣ n tama-agi, i walla-n akken asenfar-agi yewwi-assen-d axeddim s ṭaqa! Amek ihi ? Ma yella ad neǧmaɛ akk tiɣiwanin-agi, ur nettaf ara ula d 20 n yimukan n uxeddim uqbel asenfar-agi. Tama-agi n’At Ɛebbas tenṭar aṭaṣ, tenḥaf dayen kan, imi axeddim ixuṣ mliḥ. Yuɣ lḥal tiɣiwanin-agi zgan-t-d deg yidurar, yerna ttwattun-t ! « Dayen yessefraḥen aṭaṣ, imi ayen din n yilmeẓyen ufan axeddim deg uṣenfar n webrid Ɛǧiba-Bgayet. Ama d iɛessasen, neɣ d yimliwiyen, neɣ dayen nniḍen, awid kan ad xedmen ad awin aɣrum nsen, yuɣ lḥal tallit-agi nneɣ tuɛar. Laɣla, tazmart, lakked d usufeɣ n tedrimt, mači dayen i sehlen fellaɣ! » akka iɣ-d yenna yiwen wemɣar i zedɣen deg taddart n’At Ṛẓin. D-acu kan, llan widak yessekrasen anyir nsen, imi aṣenfar-agi n webrid ad idum kan 36 wagguren, neɣ 3 iseggasen. Ayagi yeǧǧa kra n yimdanen, yagi wid ixedmen deg « la base de γie » ur friḥen ara s lekmal. « Maca, axeddim-agi yelha ad yettwaḥsab deg taǧriba. Akken nessen aṭaṣ n tkubbaniyin i yeṭṭalaben taǧriba deg uxeddim ! » ɣef akken iɣ-d yenna yiwen ulemẓi i xedmen deg uṣenfar-agi.
Syphax.Y