Tadyant n usaru L’Oranais d Chemseddine-nni n tilibizyu Ennahar tebγa ad aγ-terr γer tallit-nni n FIS asmi i ‘’ḥarrem’’ akk sinima akked wayen ur neffiγ ara fell-asen : meḥsub kra ara d-yekken γer wiyaḍ ; kra n win yettxemmimen neγ win i d-yesnulfuyen ur yesεi ara amekkan-is di ddunit-a ; d nutni kan ara d-yeqqaren ayen yefγen γef yimdanen si yal aḥric n tudert. Fiḥel ma teṛziḍ aqerru-k, iwumi ara txemmeḍ imi llan wid yettxemmimen di nnuba-k.
Amek, dγa, Chemseddine-agi, ad ifeti γef wayen ur iwala ara.Yenna-d ur iwala ara asaru-agi ? Ad yeḥkem γef urgaz ur yessin ara ? Zaεma yenna-d imjuhad ṭṭfen tanegḥelt deg ufus-nsen mačči d taqerḥet n Whisky, sεeddayen uḍan deg umadaγ mačči di Cabaret akken yella deg usaru-agi ! Meεna, acu ur yeẓri ara Mass-agi, d akken asaru yettmeslay-d aṭas γef mbeεd timunent n 1962. Lukan yeẓra d acu iḍerrun di tmurt tili ad iẓer d akken d imjuhad i yesεan tesriḥat n ttbarnat d imezwura. Am wakken, di&gamma,; ilaq ad iẓer mačči akk wid ijuhden d lmalaykat : llan akka, llan akka ; ur ilaq ara kan ad ten-nεebbed s tuqqna n yiẓri. Yerna asaru yemmal-d tikti n bab-is kan mačči tin n tmetti. Win yebγan ad t-iwali, ad t-iwali, wayeḍ ur yettwaḥettem ara fell-as.
Xas ulamma amdan-a yezmer ad d-yefk tamuγli-s γef usaru L’Oranais, meεna llant tlisa ur yettzeggid ara. Ur yezmir ara ad yessiwel γer tmenγiwt, ur yezmir ara ad yessiγ ajajiḥ n lfetna, syin ad d-yini wagi d rray-iw. Lkerh d cwal mačči d tamsalt n rray, d tamsalt n ẓẓur akked rebrab.
Ayen ibanen, iban. Amdan-a yebγa ad d-yerr timetti γer yiseggasen-nni 1990. Ass-a ur ffiγent ara fell-as tzeγwin n sinima ifetḥen, ur ffiγen ara fell-as yisura i d-yettnulfun, ladγa s teqbaylit, ur ffiγen ara fell-as yinaẓuren-agi yessaẓayen idles γer sdat, ur teffiγ ara fell-as temsal-agi n tlelli n ddin…atg Meḥsub ulac akk d acu yeffγen fell-as daymi i d-yezga mgal kulci…Amek amdan am wagi ifeti γef lecγal yexḍan ddin ? Ad ak-d-yini amek ilaq ad tidir segmi ara d-tekkreḍ alamma temmuteḍ, u netta yerra-tt kan i umeslay, ur yettidir ara…
Hocine.M