Deg wass n 11 deg unbir 1956, deg taddart n Ighil n Boukiassa i d-yezgan di tγiwant n At Yeğer, i tessenger Fransa tinezduγin-is.Ala yiwet n temγart i yeqqimen dinna, imezdaγ akken ma llan rewlen γer tuddar i asen-d-yezzin imi Fransa tessegrareb-asen akk ixxamen-nsen. Γef sebba n wanect-a, nesteqsa yiwen inigi n tedyant. Wagi d Mass Remidi Nacer, i nemlal dinna u netta d aselmad deg tesdawit n Mulud Mεemmri n Tizi Uzzu, yenna-d :’’ imdanen n taddart-a, kkren-d mgal Fransa. Nnan-as d lmuḥal ad neqbel ad tili lkazirna n Fransa di taddart-nneγ. U gan yiwet n l’embuscade dagi, daγen, i lεesker n Fransa anda i asen-nγan aṭas deg-sen. Ihi, syin i teggul ad d-terr ttar deg-neγ. Imir i teggul ad temḥu zarriεa n les fellagas n taddart-a, akken i aγ-qqaren. Fkan-aγ snat n swayeε i wakken ad neffeγ si taddart. Syin bdan-d tiyita s ruplanat akked les obus armi i tt-sseγlin. Seg yimir i texla taddart armi tewwi Lezzayer timunent ay bdan ttuγalen-d yimezdaγ yiwen, yiwen.’’ I wakken ad asen-rren tajmilt i yimeγras n tama-agi d wid-nniḍen, thegga-d tiddukla n taddart n Ighil n Boukiassa yiwen wass n usmekti n tedyant n 11 deg unbir 1956. Ayagi, yella-d ass-nni n 14 deg unbir 2014 anda i d-tella yiwet n temlilit tameqqrant gar yimjuhad i d-yeqqimen akked yimezdaγ n taddart d yinebgawen-nsen. Di temlilit-a, tettunefk teswiεt i kra n yimjuhad i wakken ad d-smektin tidyanin yeḍran yid-sen, ladγa, di tama-agi n Yeğer. Gar-asen ad naf Mass Si Ouali, imḍebber n tuddsa n yimjuhad n lwilaya i yessutren seg yimezdaγ n taddart-a i wakken ad semmin i yiberdan d yimekwan s yismawen n yimjuhad. Aya, yeḍra-d mebεed mi sersen tameqqunt n yiseğğigen γef yiẓekwan n wid yemmuten. Syin, ggran-d di tsebdadt i tga taddart i yimeγras. Ma γef leqdic-a, yenna-d uselway n tiddukla Mass Hadjal Ahcène :’’ tajmilt-nsen d tameqqrant, amek ur ten-id-nettmektay ara !? D nutni i aγ-yeğğan ad nettidir di tlelli. Ihi, ayen i asen-nexdem drus.’’ Tajmilt tameqqrant, di&gamma,; i yilmeẓyen n taddart-a imi qublen akken iwata timlilit akked yinebgawen. Nessaram ad yili d amedya i tudrin-nniḍen. Afud igerrzen.
Hocine.M