Ur as-nsell akka deg Wehran neɣ deg Seṭṭif, kra n yiɣermanen (citoyens) n Tmurt n Yezwawen yeqqel-asen ugzam n ubrid ugar n tannumi dɣa teddun ad t-sserbun d idles. Seg wacḥal-aya tura, taluft-a n usekker yiberdan tban-d d aɣilif amezwaru n yal yiwen seg-neɣ. Anehhar yuɣal iɛuff abrid imi sanda yeffeɣ ad yaf asergel ara t-id-yerren s axxam-is. Deg Bgayet ladɣa, aseggas-a n 2014, yezga ugzam n ubrid am wakud fell-aɣ, almi yeqqel d anezgum daɣen d amezgun. Seg Lberj n Mira ɣer Yiderginen, ɛeddi akin i Suq Letnin, Aweqqas, tsemmḍeḍ alama d Bgayet neɣ d Aqbu, yal mara sɛan yimezdaɣ aɣilif akked yinesdabuyen idiganen (autorités locales), ur asen-yewwiḍ lgaz n lḥiḍ, neɣ ur asen-muggen yiberdan, neɣ wissen d acu llan sutren ur ufan win i d-yerran i tiɣri, ad ruḥen ad ččaren abrid d iblaḍen ad t-gezmen i yiman-nsen, i wayetma-tsen. Lɛada-ya ur nemɛin iban ur d-tettawi ayen iwatan, imi dɣa taggara-ya imezdaɣ n yiwet n temnaḍt qeflen abrid, iwacu? Acku ttnarafen ɣef wiyaḍ i igezmen abrid daɣen. Akka a Tamurt n Yezwawen! Ɛni d tidet wi ixeddmen akka ur ufan ara tabadut (lḥel) nniḍen bac ad sutren kra neɣ d kra, almi i tent-yuɣ usaɛdi ɣef umcum? Ur d amuḍin yewweḍ deg wakud i sbiṭar, ur d amzenzu yessaweḍ sselɛa-as ɣer tḥuna, ur d axeddam ǧǧan-t ad iɛeddi akken ad yexdem ɣef tarwa-s, ur d asdawan yelfa tasdawit i tezrawin-is (études) ɣef yiman-is. Ihi am wakken seḥbasen tudert ɣef waytma-tsen ed yiman-nsen. Rnu-as ttḍurrun tadamsa (économie) n twilayt-nsen send takkit (kullec). Acku ma nesteqsa: ɣef anwa gezzmen abrid? ɣef lwali? ɣef uselway n tdayra? Win n tɣiwant? Ah ! nutni ur nṭerren ara seg wanect-nni, d ayen yerzan kan iɣermanen. Rnu atan yennulfa-d ula d agzam deg yiḍ akken gan tikkelt iɛeddan imezdaɣ n Tenia deg yiberdan iɣelnawen wis 21 ed wis 26. Ihi yewwi-d tura ad nesteqsi iman-nneɣ, sanida akka nteddu s lɛada-ya? Acimi mačči d ayen nniḍen ara neḍfer? Acku send ad yeg walbaɛḍ kra yessulef tazwara ad isenned ɣef lkaɣeḍ, meḥsub ayen yessutur, amedya, ma i tɣiwant-is, ad yaru tabraṭ n tisutriwin, syinna ma yufa-d amtawa (accord) akked yemḍebbren yelha, ma ulac ad iɛeddi ɣer tigawt nniḍen, maca a win yufan mačči d agzam n ubrid.
Mhenni Xalifi