Am yal leεwayed, imezdaγ n tudrin n temnaḍt n Wizgan, rran lwelha-nsen ussan-a γer weḥric n tfellaḥt akk d lecγal i ten-yettganin. Ula d ameslay yezga i tezi γef uzemmur, lγella d ttawilat iwulmen i wejmaε-is, imi tizemrin wḍent i wecraw, d tallit iwatan n lqeḍ uzemmur. Dγa ussan-a, imezdaγ n tudrin n temnaḍt n Wizgan bdan ttefγen γef tẓegwa d tfarkiwin-nsen akken i yuγen yakan tanumi anda i kkren i yefrasen i wejmaε n lγella uzemmur akken iwata lḥal, imi asafar-agi d rreẓq-nsen n yal ass. Lḥemla n lqeḍ uzemmur tbedu deg aggur n wunbir; tettfaka deg aggur n furar s teγzi n 04 wagguren, anda i saxdamen laεwayed i d-ğğan lejdud, imi deqs n twaculin i yettikin di twiziwin n lqeḍ uzemmur, anda i ttefγen d tirebbuεa, meẓẓi meqqar, argaz tameṭṭut, anda i d-yettak udem n tdukli d tegmat ger imezdaγ. Maca aseggas-a yella-d lexṣaṣ meqren di lγella n uzemmur dagi di temnaḍt n Wizgan d temnaḍin niḍen n tmurt n Leqbayel, anda tamentilt n lexṣaṣ n lγella uzemmur tcud γer 03 n wugguren : ugur n tmes i yeččan acḥal n yihiktaren n tẓegwa deg tallit-ni unebdu yezrin., ugur n lexṣaṣ n waman ur d-yeγlin-ara deg lawan d wugur icuden γer wemdan, imi deqs n yemdanen i γeflen γef tfarkiwin-nsen, ur xedmen-ara akkal, ur bden-ara s lxedma γer tzemrin-nsen akken iwata lḥal, am afras d umenγac. Γer tagara, γas akken lγella ur teqwi-ara am iseggasen yezrin, maca imezdaγ n tudrin n temnaḍt n Wizgan, tteqsaden s waṭas tifarkiwin-nsen, i wejmaε n lerẓaq yellan d wefras n tzemrin.
Islam Bessaci