Ad yazzel yimru, ad yenǧer tiregwa ɣef lkaɣeḍ. Ad yeqwu wawal, alama yeseɛzeg widen ur nsel. Nennum addud ddew iɣerban yegrarben. Ddew ixerban. Ddew tizeɣwa yeɣlin. Ddew lemqmat yegrarben. Nennum amejed zdat iɛamuren n wakal. Nḥamel ṛṛiḥa n lɛefan. Nḥamel isɣaren imerka. Nḥamel tucga ɣef izuliɣen n leɣrur. Akka id nekni alama iɣ-faten yemdanen i netteqliliḥ ad sen nerr azal. Yella deg awal “ asmi yedder yecqaq aɛaqqa n ttmer, tura mi yemmut ɛalqen-as aɛarjjun”. Nesla yella wacu id tt-heggin akken ad as rran tajmilt. Nekni s yinaten-agi nenna: “tidet mačči kan d tajmili i yuklal, imi am netta ulac timital. ”Meɛna nugi a neddu d ẓẓiyar yesṭṭqten zhir ɣer tuqubtin tilmwain , imi werǧin nessin tikli uẓerẓur werǧin nelmid tikli ufaruj. Win iwahmen xas ad yesteqsi. Ur nelli seg widen I teččḥen. Lejwab iban. Ur yelli n wass-a, ur yelli n yiḍelli. Telha tajmilit limer yewweḍ lxid ɣer tisegnit. Yelha usemɣer n wamdan limer mačči d tulsa n wawal akn am win tewet tmagert. Netta s zikk id yenna : “ ddu d-ubrid-ik ay uhḍiq, wama d agi, yeqwet uɛiwed n yiɣes asewwi. Fihel tuzya d ttunḍa , ur yelli d acu ara twaliḍ. A win ileḥḥun deg yiḍ a win ileḥḥun deg uzal, i tezzi lmux-iw”. Nesla , slan, ahat a teslem ula d kunwi acu id sewjaden. Timḥermin tiberqacin , lefwaḍi turqimin ad nḍent i tṣaddarin akken ad ɣument leɛyub akked timenqas. Si zik ne neẓra tismin terwent-d ala nḥas. Meɛna tecmet werǧin a tt-iɣum ukaḥal, adaṛ uzlig ula id-as d yega uxelxal. Ma ṭas as yuɣal d ackal. Akka ula d leɛib-nneɣ. ur yelli-ara d imṣeḍhi. Yessen amek ad yeflali akken ad yaf abrid ɣer tqaɛet. Yettenfal-d gar yinzizen imqerṣa. Tafawet werǧin tewwid d tenqedurt, u teqendurt yellan werǧin i s-nnunef melba tifuwta. Neɛbbed asmerqaɛ! Amek ara yeddu wul ɣer reḥba meskud tasa tnegi s tewla? Hum u ɣum ṛebbi ɛaziz lebsel qareḥ. Yeɣli yicer ɣef akal, ahat dayemmi akka sliɣ la ttmejident lxalat . Wama yelha ad nemekti. Yelha ad neskfel tiden n yiḍeli. Yelha ad nemkti asmi akken, awalen-is s tufra, iten-nettawi. Wihin deg qelmun-is , tihin deg iciwi-s. Seg tasfift ɣer tayed, nnḍen yisefra-s ɣef tudert d lexlawi. Kecmen leḥwari cergen aɛjar n tsusmi. Ddin yufa wejṭuti abrid ɣef unnar akken ɣef allen ad yezwi tindal. meɛna acu tebɣa-m: taqabact id yeddem teḥfa,dayemmi Na Fati tewet-itt lwehma. Lewehma iɣ yeǧǧen nebehba, ur negzi tin ur nebri I ta. Inni-as kan i bab n wawal: “ afurk ɣef nejgugel yerka. ” Ansi akken i-iɛedda lɛez ad immeɣ ddel. Awal ur yelli d asmiri, imi adif-ines d-aciri. Ulas imesli yuɣen leqrar seg yimmi. Ulac affus icebken ɣef ubeḥri. Imezwuya neǧran tira ɣer ublaḍ. Reqmen tudert-nsen ɣef usɣar. Tifinaɣ d lewcayer. Times ma telha i tuqda, aḍar yelha i twefɣa. akken ad ttdum lḥamu di tẓeqqa ilaq asɣer ara yesmeɣren tafa. Awal-nneɣ neǧǧa-t iruḥ seg imi akka nebḍa am ibawen ɣef lluḥ. Acu n tajmlil a bu tajmilit, acu n tebḥirt a bu teqwirt? Yella deg awal lebɣi-nneɣ meqqer , ul-nneɣ meẓẓi. ahat limer ad yuɣal ad yinni:” Acu-t sirk-agi?Ayen akka tɛebdem ṣelṭan n mejbada? Ayen akka teddam d iqanen? Ayen akka iwen yeṭṭef asawan Si Qeddur u rbaɛtu? Aɛni tettum belli albeɛd akken izebbel yerna mačči d aɛdaw ayen-nni, wayeḍ akken id yesukes yerna mačči d aḥbib ayen-nni? Meɛlum a tettum imi izzi kan iwen-id yecnan kunwi ad taɣem disk-ines:” Iḍelli leɛca, mi txeraq yis-nneɣ targit, nuffa amdan yettneẓma. Mi ten-lluɛa nnena-as acu-t waya? Iself i-wudem-is yenna: “ ḍemɛaɣ tubit n lewqam seg widen ur nessin lewqam. Tura zrin leɛwam, anda iyi tebra-m iyi-d tuffa-m. D lexyal yeddurin lexyal. Ɛabbeɣ am uɛarrus ajeɣlal. Ur tegziɣ d -axxam neɣ d lḥebs i ledwam”. Limer id ak-terbiḥ ay ul, ass-a kra yura Muhya aten yefɣed d-adlis. Yettnuz anda ttnuzun tektabin . Yeččur timrefɛin anda ttrusun yedlisen. Limer di tebḥent tinedlisin n yidlsen n Muḥya, tili ad yili s wacu ara nezdi lqed. Meɛna akken qqaren : ay atma llah lḥedd, imi lewqam ur as-yezmir ḥedd, aqleɣ am wid ur neɣli ur nbedd!
Ait Slimane Hamid