Tɛedda akken ilaq tfaska n Udrar n Fad!

Partager

Akken yella yetturaǧu, tezzi deg kraḍ n wussan tfaska n tmedyezt tamaziɣt d tajmilt i Dda Lmulud n At Mɛemmer, s uḥḍar n yimeyyaten n yimeɣnasen. Taẓrigt-a, yuɣ lḥal, tettwabud i tgejdit n ccna amḥaddi, anaẓur Lwennas n At Lewnis (Meɛtub). Deg wass amenzu, mi ttwaldint tefsarin n tfaska rnan ttwajerrden yimekkiyen, yella-d usenɛet n temzikkin n Tesbeddit Meɛtub Lwennas. Almi d 14sr n uzal tettwaldi s wudem unsib tfaska s wawalen n uselway n Tdukkla Tadelsant Adrar n Fad mass Fares Bakkuc, anmazul-is mass Sadeq n Ayt Urbaɛ (Rebbaɛi), inebgi n yiseɣ n tedwilt mass Bujemɛa Agraw, akked uletma-s n uɣewwaɣ umi tuɣal tejmilt, massa Malika Meɛtub. Sin-a ineggura wwin-d dɣa tinagiwin-nsen ɣef bab n tezlit  » leɛmer-iw », syinna, mettwal 15sr n tmeddit, tewwi-d massa Wataḥ Lynda, d taselmadt deg tesdawit n Bgayet, yiwen n usarag s uzwel: «Tamettant ed usirem deg tmedyezt n Lwennas Meɛtub». Seg yimir-nni ala tignatin n umsizwer n tmedyezt i d-yellan alami d iḍ-n. Azekka-tuyen n sem tanezzayt, uɣalen merra ɣer umsizwer n tmedyezt i isemmden almi d imekli. Send ad d-yettwawi usarag wis sin n «Ba Salem chantre des Ahellis du Gourara dans la traversée de Mouloud Mammeri» sɣur massa Buxellu Faṭima. Mi tɛeddi tegnit nniḍen n umsizwer n tmedyezt, yemmug usarag wis kraḍ sɣur mass Yalla Seddiqi ɣef «Seg temlilit akked ugdud ed yiẓuran ɣer temdanit n umedyaz». Akken, fell-as i d-yewweḍ yimensi send ad rǧun merra ttiɛad n ccna i d-yeḍran sɣur ddeqs n yinaẓuren gar-asen mmi-s n Udrar n Fad Wali Ɛebdelɣani, Bujemɛa Agraw akked Ḥasen Aḥres. Merra wwin-d s tuget tizlatin n Lwennas n Ayt Lewnis i uzayez i iḥeḍren s ṭṭaqa. Ma yella d ass aneggaru tettwasenɛet-d tvidyut n wid irebḥen ilindi, synna ttwaferqen warrazen i wid i d-yufraren deg teẓrigt-a tis 14. Dɣa, ɣef waya ara d-nuɣal tikkelt i d-iteddun.

Mhenni Xalifi

Partager