Ddurt iεeddan i d-yesken Mass Youcef Amrane asaru-ines, i tikelt tamezwarut, iwumi yefka isem ‘’Cris Du Silence’’ neγ ‘’ Isuγan N Tsusmi’’ deg tzeqqa n tmeγriwin n uxxam n yidles Mulud Mεemmri n Tizi Uzzu. Asaru-a, yura-t netta u yessufeγ-it-id netta. Youcef Amrane yettwasnen deg uḥric-agi n sinima, yerra ddehn-is abrid-a γer wuguren i d-ttmagarent twaculin s umata. Wagi d cwal i yettilin, yakan, gar urgaz akked tmeṭṭut-is anda tettawaḍ teswiεt γer tyita. Akka, dγa, i d-yesken tudert n snat n twaculin yettidiren di twaγit-a. Deg yiwet n twacult, d argaz i iḥeqqren tameṭṭut-is : yekkat-itt, deg tayeḍ d tameṭṭut-nni i itekksen sser γef urgaz-is. Deg sin yid-sen yirgazen-nni, rran-tt ala i tissit ayen i d-yeglan s twaγiyin timeqqranin-nniḍen. Xas ulamma Youcef Amrane ur d-yesban ara sebbat neγ iẓuran n twaγiyin-a, meεna yemla-d s telqayt sanida ṣsawaḍent, ladγa, wid-nni i tent-yettaγen s waṭas, wigi d dderya. Γef wanect-a,dγa, i d-yenna :’’ur nezmir ara ad d-nemmeslay deg yiwen n usaru γef sebbat d wayen s wayes i d-gellunt. Aya, laqen-as sin n yisura, yerna mulac ad yuγal d afetray (documentaire). Deg usaru-a, nebγa ad d-nesban tama-nni i d-igellu s cwal d tyita deg twaculin, ladγa γef yigerdan.’’ Ma γef sebba yeğğan amseḍru-agi (réalisateur) d akken d wid yeččan tiyita ara tt-ixelṣen deg taggara, yenna-d :’’deggreγ lecγal armi d tilisa i wakken ad d-iniγ ndama d taneggarut. Ihi, bnadem, ilaq-as, ad imeyyez uqbel ad ineggez, akken qqaren yimezwura.’’. I wakken ad d-yemmeslay bnadem γef wuguren n tmetti, ilaq-as ad yefhem aṭas n temsal, nestaqsa-t, di&gamma,; γef tama-agi, yerra-aγ-d :’’nudaγ u γriγ aṭas n yidlisen deg uḥric-agi. Ur d-yusi ara kan akka usaru-a.’’ Ayen igerrzen deg usaru-agi, zyada γef wamek i tturaren s daxel-is, d aẓawan (lmusiqa) i as-yexdem Mass Amrane. Ula d acennay n tsuta-agi i d-yettnekkaren, Abdenour Chabli, yerna-as-d sser s tezlit-is.
Afud igerrzen i wid akk yessaẓayen idles γer sdat.
Hocine.M