Taneggarut n tneggura, d tagi n Saint Valentin i iḥerrem usalafist Hamadache. La d-yeqqar d leḥram, d lεada yessufuγen i ubrid, meḥsub mačči s adrar i tettawi.Γur-sen, tayri d leḥram. Ur ilaq ara ad tḥemmleḍ, neγ meqqar ḥemmel s tuffra. Ala lkerh i d-yeddan deg ucwari-nni-nsen. yenna-as Slimane Azem :’’bγiγ ad xedmeγ lemziyya, fkiγ-as claḍa i uγyul’’. Efk-as tura tajeğğit i taγadt, wali ma d asriḥi ara tt-tesriḥ neγ d lmakla ara tt-tečč ? Ihi, ‘’azger yeεqel gma-s’’. Ussan-agi kan, Moussa Ismail i as-yennan ur ilaq ad heddren tamaziγt di lğameε. Yerna wagi d ccix zaεma. Meskin imi netta yessen kan yiwet n tmeslayt, iγil ula d Rebbi s taεrabt kan i yettmeslay. ‘’Muḥal ad fehmen, ur ssefhamen, d laẓ tilufḍa i d actil-nsen’’ i as-yenna Lwennas. Llan kra-nniḍen ufan-d akk ‘’lεilm anda yeffer’’. La ttεeddayen γer ttbaren, la asen-qqaren ur tennḍet ara crab daxel n lğernanat yuran s taεrabt axater yella wawal n Rebbi s daxel. Amek, ihi, ara as-yexdem win yeqqaren lğernan-agi n taεrabt ? Yeqqim-d kan ad t-yesserγ. Lğernan n taεrabt srid γer tmes, γer ğahennama. Telha tagi ! Neγ ma bγan ad qaddren leqran, ur t-id-ttarun ara deg yiγmisen. ‘’Wwin-d aγilif d yicwura n lkif,
Γer tmurt n lejdud gren-d asurif, Σebblen-d ad beddlen leεyud n udrar n nnif.’’ Ikemmel Lwennas deg wawal-is. Akken yebγu yili lḥal, Saint Valentin igerrzen i wid iḥemmlen. Xas yella yiwen n umeddakel (Brahim) yekreh Saint Valentin imi ass-nni swaswa i t-teğğa temeddakelt-is tuγal γer wayeḍ. Smaḥ, smaḥ kan ay ameddakel.
Hocine.M