Gar-aneɣ d kra n wussan, Tuddsa n wid ur nettwali n twilayt n Bgayet ad theggi iman-is akken ad tili i walmend n ugar n mraw d ameɛḍur, i ara yerzun ɣef Wammas n Usileɣ Asadar (Centre de Formation Professionnelle) n Bgayet. Tura s useggas-a, ad tili tuddsa-ya tessaweḍ ad tesuddes i useggas wis kraḍ asileɣ-a i wid mu nessawal « iderɣalen », yettusemma n wallen. Imdanen-a ihi, ad ssawḍen deg teɣzi n 12 n wayyuren ad d-awin agerdas ara asen-yefken azref ad qedcen deg walbaɛḍ n tkebbaniyin neɣ n tdeblin. Anect-a iban yella-d s tallelt n unemhal n Wammas n Usileɣ Asadar, maca daɣen s tin n Tmehla n Tigawt Tinmettit (DAS) n waɣir n Bgayet, skud sɣur-s ay d-yettas udrim ilaqen. Aselway n tuddsa-ya mass Ɛisani Ɛebdelḥakim yenna-aɣ-d dakken umuɣ (liste) n yinelmaden i ara yeɣren aseggas-a yeččur, maca yefka-d ttiɛad i wid yebɣan ad ttwasilɣen qabel, ad heggin iman-nsen i uxdam n sin neɣ tlata n lekwaɣeḍ kan imi tiwwura-nsen zgant ldint. Asileɣ ɣef wacu i d-ttɛeddayen yimdanen-a i ur nettwali ur yelli d uwɛir ɣef leḥsab n wid ijerrben yakan. Imi deg tazwara ad asen-slemden yiselmaden agemmay-nsen uzzig, win i sseqdacen s yifassen-nsen. Mi ara kksen aqeddic amenzu, ad yettwassemres ɣef yinelmaden wahil ideg ara ɣren allalen-a atraren n teywalt (communication) ; amezruy-nsen, azal-nsen, nnuba-nsen, akked yineɣmisen akk i ten-yerzan. Aḥric-a n wahil ad yemmag deg ddeqs n wakud alama gzan yinelmaden s telqey amaḍal-a n tilifun ladɣa, imi fell-as i xeddmen asileɣ. Syin akkin, mi ara ilin yinelmaden ugmen-d xilla n tmussniwin timeẓrayin, ad ɛeddin ɣer uqeddic n tidet : winna n usemres. Akken ma llan yinelmaden ad ɛeddin ɣer tigawt: ad yettwasres sdat n yal yiwen tilifun yersen (fixe), bac ad lemden amek ara ssiwlen i kra n wuṭṭun, amek ara refden i tiɣri, neɣ amek ara ceyyɛen win i d-yessawalen ɣer yizireg wayeḍnin. Mi ara lemden dayen amenzay n twuri-nsen tamaynut, ad sɛun yimdanen-a i ur nettwali agerdas n uɛessas n tilifun (standardiste). Dɣa yiwen seg wid i d-iḥellan agerdas (diplôme) ilindi yenna-aɣ-d: « Aseggas-nni i ɣriɣ dinna akked yimdukkal d awezɣi ad t-ttuɣ. Tura aql-i d axeddam s tallelt n la das. Ɣas ma lexlas ur igerrez, maca akka wala ulac maḍi. Ilaq ɣef yal aderɣal ad yeg asileɣ-a ». D asileɣ s wazal-is, skud d ayen ara yeǧǧen ameɛḍur-a ad yekcem ugar deg tmetti. Yuɣ lḥal, ula d internet akked wallal n uselkim tenwa tuddsa-ya n wid ur nettwali n Bgayet ad t-terr gar yifassen n wid ukud tlehhu, lemmer mačči d aḥraq i yettwaḥreq tikkelt yezrin uxxam n yidles n Bgayet anda ttuɣ dduzan-a. Ɣas ma yella, anemhal n uxxam-a yefka-yasen amiru (promesse) dakken ad asen-iqeɛɛed taluft deg wakud iqerben.
Mhenni Xalifi