I lmend n useggas amaynut n 2965, inelmaden n uɣerbaz alemmas Lɛerbi at Ɛmer, s ufus n tiddukla Asaka, uran-d aɣmis s tmaziɣt.Gar yeḍrisen d imagraden i d-uran inelmaden d tnelmadin, ad naf : iḍrisen ɣef usfuggel n yennayer, tamedyazt, tinigit n tlawin meqren ɣef wamek yella Yennayer ass mi llant meẓiyit, atg. Ayen s yernan azal i weɣmis-agi, d lebɣi s wacu t-uran inemladen. Ur cuḥḥen ara i yiman-nsen, kkan-d tuddar steqsan, megren-d isallen, isefra d-yegran di cfayat n wid meqren. Akka fkan-d afus deg tira n webruy seg yidles nneɣ. Xas ahat d aɣmis ameẓyan, maca d abrid i wakken ad yekkes ckal i wid yessaramen ad arun s tmaziɣt, daɣen d tagnitt i wakken ad afen acu ara ɣren wiyaḍ. Aɣmis-agi, yettwaferqen d afraq, yeffeɣ-d s tallelt n Mass Buzwan Awmer. Deg-s, tella daɣen tadiwnit i s-xedmen i unemhal n uɣerbaz nsen mass Iften Ḥamid.
Aɣmis-agi yerna-d ar wayen meṛṛa yettwaxedmen ass nni n Yennayer, i d-sweǧden s ufus n tiddukla Asaka.
Tiddukla Asaka