Ayen yeḍran ilindi i terbaɛt n ddabex n uḍar n Tuddsa Tanaddalt n Ayt Smaɛel (USAS) atan amzun ur tettwalmed temsirt-is, ur yessecɛef ama d wa neɣ d win. Ma neẓra belli d asinaryu n yilindi i umi i d-tettales terbaɛt-a n yilemẓiyen n Udrar n Fad i yetturaren deg talɣuɣa n uḥric n yiseɣ n waɣir n Bgayet. Segmi tebda deg wass amenzu nettat txeddem ala igemmaḍ i yessefqiɛen wid i tt-iḥemmlen, almi ur iban anda-t uɣilif, ma deg uswir n talɣuɣa, neɣ deg tedbelt, neɣ deg yimyuraren, neɣ wissen d acu. Daymi nefka asteqsi-ya i yimḍebber amezwaru n terbaɛt, aselway-is mass Zuṭaṭ Kader, i aɣ-d-yennan dɣa: « sebba mi tella ass-a terbaɛt n tuddsa tanaddalt n Ayt Smaɛel deg yizireg azeggaɣ mačči d yiwet. Tazwara, ayen mi nexdem aqlaɛ d iri-t ussan imezwura. Tis snat d allalen, ilaq ad teẓreḍ dakken tirebbuyaɛ merra i iẓewren deg talɣuɣa-ya sɛan-tt ayendin d adrim, ttaɣent-d imyuraren ifazzen, rnu ttxellisent-ten akken ilaq. Seg waya ihi, tella sebba nniḍen; tin n uswir n yimyuraren ed telɣuɣa s umata ». Negza seg wawalen n win i aɣ-d-yettmeslayen dakken tarbaɛt n Ayt Smaɛel ur thegga iman-is akken ilaq, seg lexsas n wallalen, bac ad tqabel aḥric-a n yiseɣ n ddabex n uḍar deg twilayt n Bgayet. Ma yella ɣef yimal n terbaɛt-a, meḥsub ma tezmer ad teslek seg usubbu, skud d ayen i iceɣben imezdaɣ inaddalen n Ayt Smaɛel, Kader yenna-d ɣef wanect-a: « mazal nesɛa tawenza-nneɣ gar yifassen-nneɣ akken qqaren. Acku mazal ad nurar 14 n temliliyin. Maca ilaq ad ilin yid-neɣ wid terza taluft bac ad neg i warrac ttawil ad rnun ad qedcen. Tikwal ula d aman ulac swacu ara asen-d-naɣ ad swen ». Akken i d-yettban, llan kra n wuguren i as-yugin i terbaɛt ad tecceɛceɛ, maca ur ifut wakud ma bɣan ad zdin yifassen bac ad teṭṭixxer seg tura terbaɛt seg umḍiq aneggaru, war ma tesɛedda arjuj n yilindi i tt-yeǧǧan temneɛ kan s tmara seg tɣelyawt.
Mhenni Xalifi