Azemmur d azamul n tmurt n leqbayel, γef aya tiddukla tadelsant tawwurt n at-γebri n taddert tawwurt, s lemεawna n tesqamut n taddert-agi, taγiwant n Yifiγa, asqamu aγerfan n ugarzu n Tizi-Wezzu, sudsen-d tazrigt tis 02 n tmeγra n uzemmur i yeldin tiwwura-s tagara n ddurt yezrin ass n 20 furar 2015 γef teγzi n 02 n wussan. Asentel n tfaska n useggas-a « Azemmur ger uγbel d usirem », id-yesduri uγarbaz amezwaru n taddert n tawwurt, anda i yukkan s nnig n 20 n yemzikniyen id-yussan si temnaḍin yemgaraden n lwilaya n Tizi-Wezzu. Ahil id-heggan γef dema d amerkanti yerna d amesbaγur, anda llant temzikniyin zzit uzemmur s leṣnaf-is yemgaraden, timliliyin d isaragen anda id-wwin awal imusnawen deg uḥric n tfellaḥt γef azal yesεa uzemmur di temnaḍt leqbayel d wamek ara d-yilli uḥareb fell-as akken ad-teqqim d lγella n lebda, d temzikniyin niḍen n lḥirfat ufus, am talaxt, aẓeṭṭa, d wayen icuden γer useḥbiber γef twenaḍt. Dγa tameddit n wass n 21 furar 2015 yezrin, tessuli tezrigt tis ssnat n tfaska uzemmur s yiwet n tmeγra meqren. Iswi n tfaska-agi d tikci n tebγest d wafud i wuẓẓu n uzemmur akken ad-yenarni yedles n teqbaylit, d tikci n wazal i tgemi. Akken tella d tagnit yelhan i yemdanen akken ad-sεun tamuγli yelhan γef lγella n uzemmur d uḥareb fell-as. Leqdic d win iεeddan di tegnatin yelhan nezzah.
Islam Bessaci