Ɣas ahat nekni mi nettwali s wallen ur neẓra d acku i d-yettilin d isiḍnen, wanag, akken i d-yenna uxxam n teslaḍ IDC, deg ukraḍyur (trimestre) wis 4 n useggas 2014, tenqes s waṭas tnezzut n yiselkimen imawiyen (ordinateurs portables) deg umaḍal, rnu mazal-itt tettader, maca kra kra.
Aya iban ansi i d-yekka, segmi ttwaferqen deg ukuẓ n tɣemmar n ddunit tilifunat imegziyen (intelligents) akked tṭabliyin, yuɣal umdan yesmenyif ineggura-ya skud ssishilen-as tudert ugar. Am usawal i ileḥḥu s uḍaḍ, s kra n yiḥerriken ad t-tḍebbreḍ akken i k-yehwa, ad ak-d-yesken ayen tebɣiḍ, ad ak-yawi ɣer ugernit (internet). Anect-a ed waṭas, rnu anda tebɣiḍ ili, war ma terniḍ taẓayt i yiman-ik daɣen. Skud isawalen-a ur ttawaḍen tikwal arḍel deg taẓayt, ur d-teṭṭfen daɣen listaɛ imi ur ttɛeddayen temɣer n ufus ɣur kra. Deg wayyur n wanber ihi n yilindi, axxam n teslaḍ IDC yessken-d kra n leḥsabat i iga, amedya, ma yella deg 2013, 315.1 n yimelyan n yiselkimen i yenzan deg umaḍal merra, deg 2014 nzan 306.2 n yimelyan. Seg waya, yezmer deg useggas n 2018 ad nzen ḥala 291.9 n yimelyan. Meḥsub tettsemmid tettahda tadert.
Ma deg useggas imed n 2014, ala 80.8 n yimelyan n yiselkimen i yemmesɣen sɣur yimsaɣen. Aya yefka-d tadert 2.4 % i useggas. D ayen i yeǧǧan dɣa ulzuz (ssuq) yesɛedday tagnit teḥres taggara-ya, acku wid i ten-ixeddmen ur dman dakken akka ara ilint tuɣalin i deffir n tnezzut n wayen i d-ssufuɣen. Ma yella d tanezzut s umata, ad tt-naf tenṭer aṭas deg Tjapent (Japon), ɣas ma tleḥḥu cwiṭ deg tama nniḍen n Tesga (Asie) ladɣa deg ttiɛadat n tmeɣriwin. Tamerka daɣen, segmi tɛedda seg 16.88 n yimelyan iselkimen i yenzan, almi 17.67 n yimelyan, teslek akken iwata. Daɣen ula d Taruft (Europe) nezmer ad d-nini ur telli d tin i tent-yuɣen taggara-ya. Aredmani, tban dakken tsuta-ya tefren yakan acku i tebɣa, imi simmal tettaẓ tetiknulujit simmal tjebbed-d ddhen n umdan. D amedya kan, tura iselkimen yersen ḥaca ttmeẓran s waṭas ɣur tkebbaniyen neɣ deg yixxamen s umḍan d ameẓyan kan.
Mhenni Xalifi