Ass-nni n laṛebɛa 25 deg furar, inelmaden n tesnawit Si Lḥesen Uṭaleb s ufus n tiddukla tadelsant ASAKA d tɣiwant n At-Yanni (APC) rran-as tajmilt i Umusnaw d yeḥyan tutlayt d yidles nneɣ, Dda Lmulud At Mɛemmer. I lmend n umulli wis 26 seg mi yemmut, smektan-t-d s wahil d-yesduklen tazuri, tamusni, tamedyazt, atg. Taṣebḥit-nni sɛeddan-d asaru n Ɛli Muzawi i yexdem ɣef Dda Lmulud. Asaru d-yesmektayen ayen yexdem d wamek d-yedda deg ubrid n usekfel n yidles nneɣ si tatut. S yin yella-d cna n terbaɛt d-yusan seg wexxam n yidles Mulud Mɛemmri n Tizi-Wezzu d tɣuri n tmedyazt sɣur Ḥsen Merric. Yiwen n umedyaz yuran aṭas yerna yessufeɣ-iten-id d idlisen. Uqbel ad kemlen ahhil nsen, ɣef 11h, rzan ar tmeqbert anda yenṭel Dda Lmulud At-Mɛemmer, ssersen tameqqunt n yizeǧǧigen, yerna wwin-d kra n awal akken ad t-id-ḥyun sdat n yinelmaden d tnelmadin. Mi yuɣalen ar tesnawit, slan i usarag i sen-d-texdem temyarut Massa Lǧuher Amḥis-Waksel, nettat tecfa-yas-d i Dda Lmulud yerna tura ɣef tsekla-s. Mi yekfa usarag, tezzi-d nnuba n tezlitt tamḥaddit i d-cna terbaɛt n yinelmaden n tesnawit. Akka i s-d-yuɣal wawal i Dda Lmulud i lmend n teswiɛt deg tesnawit n At-Yanni, i wakken ad yezgu yisem-is d umennuɣ-is ddren.
Tarbaɛt n inelmaden
Tasnawit n At-Yanni “Si Lḥesen Uṭaleb”