Tidukkla Tadelsant Adrar n Fad i d-yennernan deg wayyur n meɣres deg useggas 1994 mazal tedder ar tura. Aṭas n yiselwayen i d-yellan ɣef uqerru-s. Tidukkla-ya tettmil ɣer tfaska n tmedyezt tamaziɣt s yes i tuɣ adeg d ameqqran deg umussu adelsan. Tiwwura-ines i ten-yeldin i tikkelt tamezwarut d Mass ABDOUNE Nacer i yuklalen tajmilt tameqqrant war ma nettu wiyaḍ. Γef tfaska-ya zrin sḍis « 6 » n yiselwayen tura d wis sa « 7 ». Timlilit ad tili akked uselway-a i yellan d ameẓẓyan deg leεmer d ameqqran di tmussni.
Aɣmis n Yimaziɣen : Fares BEKOUCHE, ma yezmer s tewzel kan ad aɣ-yemmeslay ɣef yiman-is ?
Fares Bekkouche: D yiwen n yilemẓi yesεa 28 n yiseggasen di leεmer-is, yesεa agerdas asdawan deg tneglizit yekcem ɣer umussu adelsan deg useggas 2002, bdiɣ leqdic-iw d aεeggal deg Tdukkla Tadelsant Adrar n Fad deg terkeft n uẓawan, sinɣer-s, uɣaleɣ d aselway ɣef terbaεt n yilmeẓyen deg terkeft n uẓawan, s leqdic i xeddmeɣ uliɣ d amru amatu deg tdukkla, akken uɣaleɣ tura d aselway.
I wakken ad yuɣal yiwen d aselway ɣef tdukkla, imi tesεa aswir d ameqqran ; ahat llan kra n yesfernen i yeṭṭafarem ?
D tidet llan yesfernen i neṭṭafar ; dacu kkan isfernen-a mačči d aswir unig deg leqraya, maca d aswir deg umussu adelsan. Ma nefka-d amedya : S. Rebbaεi d yiwen gar yiselwayen ɣas akken aswir-is deg leqraya mačči d unig maca yeddem tidukkla i yiwen n uswir d aεlayan.
D acu-t umussu adelsan s umata ɣer Fares ?
Tmuɣli-w ɣef waya ilaq yiwen ad yefk azal i uxuddim d agraw. Wa ad yesεu iswi d asnerni n tutlayt d yidles amaziɣ.
Tura tettheggim i tfaska n tmedyezt tamaziɣt tis mraw kraḍ « 13 ». D acu d ugurem i d-tettemlilem ?
Tidet deg yiseggasen n yimzura llan kra n wuguren ama deg wennar, aheggi, tadrimt… Maca tura imi nuɣ tannumi taεekkumt tuɣal fessuset, maca uguren llan-d deg tedrimt acku ayen ad aɣ-d-ttakkent tenmehliwin teεna temsalt drus ma nesmager-it ɣer wazal yesεa usenfa yecban wa. Asnemmer i kra win ad aɣ-yettakken afus n tallelt yal tikkelt mi ara asen-tessiwel tdukkla.
Tafaska n tmedyezt tamaziɣt teldi tiwwura-s, deg wayyur n yennayer, temdel-itent deg wayyur n furar. Imi tura d aswir n ufran sɣur yimawlan n tussna. Acḥal n yimekkiyen i yellan ? Anwa yeddmen neɣ yeskeflen s ujerred n yimekkiyen deg tfaska-ya ?
Assn 26 di furar 2015, leḥqen-aɣ-d 101 n yimekkiyen, imekkiyen-a ttwajerden nceggeε tamedyezt-nsen ɣer tesqamut n yinzurfa iwakken ad tt-skazlen. Ma d yeskeflen s ujerred n yimekkiyen d tanarayt, llan deg-s yiεeggalen-a « Sadeq Rebbaεi, Yusef Zemmuri, Meqrani Racid akked Diradji Ḥabib d Wali Fawzi ».
Tafeska n tmedyezt teddem udem ussnan; aya nnan-tt-id yimedyazen i d-yettasen ɣer tfaska n Udrar n Fad. Anwi d yimassanen-a ? Amek ad as-fkan udem ussnan ?
Ad snemreɣ tasqamut n yinzurfa yal yiwen deg-sen, wi d iselmaden deg tesga n tutlayt d yidles amaziɣ deg tesdawit n Bgayet gar-asen: « Rabḥi Σellawa, Meksem Zahir, Meḥruc Muḥend Lḥacen, Buεmara Kamel, Bellac Takfarinas, Ayad Salim, Waṭaḥ Lynda, Tiɣit Muḥend Uremḍan, akked Saεdi Qasi». D nutni ad as-yefkan udem ussnan i tfaska-ya n tmedyezt tamaziɣt acku yal tamedyezt ara yilin gar yifassen-nsen ad tt-cerwen, ad tt-ɣreblen s uɣerbal ussnan, daɣen yal amedyaz ara d-yerzen ɣer umsizwer yettuɣal s uswir-nniḍen, d aswir unnig deg wannar n tmedyezt, mi ara d-yuɣal deg tfaska-nniḍen yettawi-d amaynut . Asnerni-ya deg uswir d nutni i d timental n waya. Hata amek ad as-fkan udem usnan i tfaska n tmedyezt.
Iεeggalen n tesqamut n yinzurfa, d nutni ad as-yefkan udem ussnan i tfaska-ya. Amek ara asen-terrem azal ?
Ur cekkeɣ ara ad nizmir ad asen-nerrin azal, maca array n wazal yettili-d sɣur yimedyazen i d-yettasen yal tikkelt, d usnerni deg uswir n tmedyezt seg useggas ɣer wayeḍ. Imi iswi-nneɣ d yiwen.
Ahil n tfaska d abaɣur, akken nuɣ tannumi tettili-d tmeɣra n ccna, tikkelt-a texṭarem-d Massa Malika Dumran mačči d tayeḍ ? ilmend n wacu ?
Nebda-d seg Abranis deg 2012, ɣer d Ali Ideflawen 2013, ɣer Zedek Mulud 2014, maca aseggas-a d tanaẓurt Malika Dumran acku nebɣa ad nerr tajmilt d wazal i tmeṭṭut taqbaylit yeddmen amennuɣ.
Iwakken ad nekfu tadiwennit-a d acu yezmer Fares ad aɣ-t-id-yini?
Tanemmirt d tameqqran i yiεeggalen n Tdukkla yal yiwen s yisem-is.
Tadiwennit sɣur: Nacer-AKOUCHE.