Uriɣ-am-d tabrat seg ul, meɛna ur kem-id-tewwiḍ ara, acku…Acku tettenququl-iyi nniya, ɛewqeɣ amek ara m-d-iniɣ deg-s ma ḥemleɣ-kem neɣ ala ! Wissen ahat kemm ma ad temmektiḍ tabrat iyi-d-turiḍ, din iyi-d-tenniḍ:”Iɛedda-d fell-i
uɛeṭṭaṛ yeznuzun lemḥan, uɣeɣ-d ɣur-s !” Nekk di tebrat-iw nniɣ-am: “Mi d-yewweḍ ɣur-i uɛeṭṭaṛ-agi amcum, ṭɛeɣ deg-s, ddiɣ yid-s ɣer wansa i d-yettawi lehmum yeznuzay. Ɣas akken netta yugi-yi ad dduɣ yid-s, yenna-yi-d: Ala a mmi, amkan-agi yuɛeṛ, atan ad tendemmeḍ !
Maca nekk ṭṭfeɣ di ṛnana-w ddiɣ, mi wḍeɣ ɣer dinna dehceɣ deg wayen akk i ufiɣ: Amkan-nni d asif n yidammen, ttɛummun deg-s yimdanen iyi-icuban .
Ɣef yiran n wasif-agi i yellan ḥaca idmim d teɛfeṛt d unajel ideg mcubbakent tɣiṛdmawin d tlafsiwin d yizerman di mkul ṣṣenf. Tagnawt dinna tezga teṛɛed, ini-s d aberkan deg-s zgan ttnaɣen lejnun akked lmalaykat, lḥaṣun amkan-agi yessewḥac, yessagad…”
Bɣiɣ mliḥ limer di kem-id-tewwiḍ tebrat-iw, akken ad teɣreḍ anda akken i am-d-mmeslayeɣ ɣef tmiqwa :
Timiqwa n lfeṛḥ,
Timiqwa n yimeṭṭawen.
Tid rriɣ d itran,
Deg-sent i ẓeṛṛeɣ,
Amek ggan wussan.
Yiwen wass deg ussan, mi ɛeddaɣ ad muqleɣ deg yitran-iw d acu ara yilin, mlaleɣ d tmiqit-inem, tin akken i d-ixelḍen ger tmiqwa-w, ɛeqleɣ-tt, yura fell-as s tira iḍebɛen:”TAYRI”.
Tayri i d-yeffɣen seg ul
Teffel-d ɣef acḥal n leqyud
Iwakken ad tas ɣur-i.
Seg lɛaqel ɣer umexlul
Win deg ur sudent dwawi.
Tayri i d-yeglan s ccfawa
I win umi xeṛbent tirga.
Tayri yessawalen i tidet
I win yeddren di tkerkas.
Ariḍa ul-iw mazal-it akken, yugi ad yekkes leḥjab-nni iss iɣeṭṭa iwakken ad am-d-yini: “Ḥemleɣ-kem ula d nekk akken iyi-tḥemleḍ”. Ɣas ulama yessen, yesselmad i medden dakken: WIN I K-IḤEMLEN ḤEMMEL-IT, WIN I K-IKEṚHEN KṚEH-IT.
Mokrane Chikhi