Deg yimalasen yezrin teḍra-d tigawt twenneɛ deg tesnawit Maɛuc Idris n Lberǧ n Mira, aselmad n tmaziɣ deg tesnawit-a mass Nabil Xaldi, akked kra n yimdukkal-is analas Fares Idir, Muqrani Meqran, Wadi Saleḥ, llan fesren-d tanazalt (affiche) i teqcicin tisnawanin akken xersum ad d-lsent taqendurt-nni d abrid ass n 19 deg yebrir iɛeddan. D ayen i d-yeḍran ihi, ɣas ma mačči merra, ddeqs n tezwawin tilemẓiyin i d-yerran i tiɣri usant i uɣerbaz-nsent s tkebrin-nsent tinasliyin. Rnu aṭas i yesnagan belli ass ideg i d-lsant tlemẓiyin tiqendurin, werǧin tecbeḥ tesnawit n Maɛuc Idris annect-n. « Atan aseggas-a d tigawt tafessast kan i d-yesbeyynen belli ziɣ tizwawin ḥemmlent taqendurt, wajdent ad tt-ttlusunt deg tudert-nsent n yal ass am nettat am yiselsa-nniḍen. Ihi nessaram seg tuɣalin n tɣuri i d-iteddun deg ctember ad teqqel tmelsi n tqendurt d ansay, d lɛada ɣur tezwawt ». Aya yenna-aɣ-it-id Nabil Xaldi, d aselmad deg tesnawit i d-nebder yakan. Ilaq ad d-nini dakken ass-a tizwawin ur llant ara d nutenti akken i d-yewwi, skud aselsu-nsent ansayan i yellan d taqendurt atan yettwasres s yifassen-nsent ɣer tesga. Rnu, ula sɣur wayeḍ tella tebɣa ad d-tekk tiyita, imi ula deg yiɣerbazen llan kra nwan ad tt-gedlen i teqcicin tizwawin ad as-tiniḍ taqendurt ur tecbiḥ ayendin ama ɣef tin i tt-yelsan, ama i wallen yettwalin. D ayen i yeǧǧan ihi ddeqs n tezwawin tikkelt yezrin mmeṭlaqent ɣer uselsu-nsent ansayan deg umaḍal merra, gan-t d tajmilt i yiwet n tesnawant i d-yettwaqeccɛen ilindi seg uɣerbaz-is deg Tmezrit acku telsa taqendurt n tezwawin. Deg Kanada, deg Lezzayer, deg Taruft, deg Tezwawt, llant di ttiɛad deg yiberdan, deg yimeḍqan n uqeddic, bac ad d-sbeyynent dakken d zzman kan i tent-ikellxen ma yella ur neccdent taqendurt-nsen ala deg tmeɣriwin. Ɣef waya, la nettmesteqsay lemmer ɛni tizwawin merra n Tezwawt (Tamurt n Yizwawen) ad refdent taqendurt-nsent akken ilaq, acḥal ara tecbeḥ tegnit n tuɣalin ɣer uẓar i yellan d leqrar n tudert n yal aɣref.
Mhenni Xalifi