Iḍelli i tebda tfaska taɣelnawt tis tlata n unelmad di tesdawit n Bgayet. Tafaska-agi ara yilin d asmekti i wass aɣelnaw n unelmad 19 mayu 1956 d tedyanin n 19 mayu 1981, i tt-id-yessudsen d Aqusis ussnan n yinelmaden n tmaziɣt n tesdawit n Bgayet s lemɛawna akked tɣiwant n Bgayet . Wid i d-yeswejden tafaska-ya, xedmen-d yiwen n wahil d amerkanti ara yeqqimen i teɣzi n 04 n wussan (seg 17 ar 20 mayu), anda ara mmagen waṭas n warmuden idelsanen, ussananen d waddal ama deg wammas n tesdawit Ubudaw neɣ deg tmezduɣin tisdawanin yecban 17 tuber d Bercic 1. Taṣebḥit n wass-a, ad yemmag di ludiṭuryum n Ubudaw wass n tezrawin ɣef tmaziɣt d usexdem-is di ttawilat atraren n tiknulujiya iɣef ara d-yili i lmendad pṛufisur Kamel Bouamara. Deg urmud-a, ad d-ilin waṭas n yisaragen ara d-yawin ɣef yisental icudden ɣer tmaziɣt di tsenselkimt d lantirnat. Seg wid ara d-yefken isaragen, ad d-nebder : Nacer Mehdi d Mohand ou Ramtane Ighit i sin yid-sen d iselmaden deg ugezdu n tmaziɣt n Bgayet. Yella daɣen usarag ara d-yefk, Paul Anderson, netta d yiwen n umnadi agnizi i ixedmen aṭas n yinadiyen ɣef tmaziɣt di tsenselkimt. Ma d tameddit n wass-a, ttiɛad ad yili di tmezduɣt tasdawant 17 tuber, anda ara d-tili temlilit n ddabex n ufus ger tnelmadin, ad d-tili daɣen temzizzelt n umezgun anda ara d-yili umyezwer ger snat n tceqqufin i yettwafernen. Deg wass n ttlata 19 mayu, ad d-tili yiwet n tmeɣra ɣef lweḥda n tmeddit di Abudaw, ma deg yiḍ, leqdic ad yemmag di tmezduɣt tasdawant Bercic 1 anda ara tkemmel temzizzelt n umezgun, yerna ad d-tili temlilit n ddabex n uḍar ger yinelmaden. Deg wass aneggaru, leṛebɛa 20 mayu, ttiɛad ad yili deg uxxam n umezgun n temdint n Bgayet anda ara ttunefken warazen i wid d tid i d-yufraren di temzizliyin. Rnu daɣen, ad d-tili temzizzelt n tira n tullist d tɣuri n tmedyazt. Akken ad d-nesmekti, aqusis Tumast d netta i d-yessudsen meṛṛa tifaskiwin yezrin n tmeɣra n unelmad di tesdawit n Bgayet. Aya yessebgan-d leḥrara d takayt i yellan ɣer yinelmaden iɛemṛen aqusis-a d yinelmaden n tmaziɣt s umata i d-yufrarin ɣef wiyaḍ ilmend n leqdic-a yesɛan azal.
Mokrane Chikhi