Asfugel n Yennayer deg berra n tmurt

Partager

Amenzu n yennayer d leḥsab n tazwara n useggas ɣer yimaziɣen. Xas ulamma aṭas n yimharsen i iɛeddan ɣef ugdud-a, meɛna aya-gi ur t-yeǧǧi ara akken ad ttun aẓar-nsen d yidles –nsen, neɣ ahat ad mmalen ɣer yidles n imḥarsen i iɛeddan si tmura n umaziɣ. Jjguglen deg wayla-nsen: seg Tegzirin tiknariyin seg umalu ɣer Siwa di Maṣer; seg yilel agrakal seg ugafa arlamma d timura tiberkanin deg unẓul. D tagi i d tamazɣa i yeṭṭfen deg wayla-s. Xas ulamma di tmurt n Lberrani i llan yiqbayliyen anect-a, ur d yuzgi ara d aɛewwiq akken ur sfugulen ara ixef n useggas n yimaziɣen , aṭas n tdukliwin tidelsanin i d-iheggan i tugnit-a, gar tddukkliwin–a, ad nader : tidukla ACBO i yextaren sin yinaẓuren sin n tgejda n cna n teqbaylit , akken ad asen-arren tajmilt wigi d : Sliman Azem akked Cheikh El Hasnaoui , aṭas n wid i yecnan di tmeɣra-a : Agraw Amzik, Cherif Hamani, Malika Yami , Rachid Mesbahi, Lounes Kaci, Kamal Syammour. Yella-d usfugel-a ass n 13 deg yennayer 2018 di Le Château des Rochers n temnadt n OISE. Mi nesteqsa aselway n tddukkla Mass Baaziz Karim ɣef usfugel n yennayer di tmurt n lɣerba ha-t-an wayen i d-yenna : ‘’Nesfugul yennayer am Leqbayel merra, tameddit n wass n 11 deg janvier, nxeddem seksu bu sebɛa yisufar, nettemlili akked leḥbab. Yesɛa leqdic adelsan azal meqqren deg usejhed n tutlayt d yidles, ladɣa di tmura n lɣerba’’. Si tama-nniḍen, tella-d daɣen tddukkla n « Afus deg Ufus » di temnadt n Lille. Iɛeggalen n tdukkla-a, ur zgilen ara tagnit-a akken ad heggin ula d nutni kra n leqdicat i lmend n umenzu n yennayer. Yella-d wahil-nsen s usewjed n seksu akken i d-yella di merra n yixxamen iqbayliyen, am wakken i tella tarbaɛt n yiḍebbalen akked terbaɛt n cdaḥ . Ma yella d tiddukkliwin tidelsanin i yellan di temnadt n Leqbayel, ula d nutenti ur zgilent ara tafaska-a. Nezmer ad d-neder, d amedya, tiddukkla tadelsant Tussna n taddart n Ubizar, ula d nettat texdem ahil s wazal-is imi ass n Sebt 2 deg yennayer 2968 xedmen timsizzelt gar yiɣerbazen ilemmasen: Amatoui Mohammed akked aɣerbaz les frères chouhada Mehala. Tella-d temsizzelt-a, d tajmilt i uselmad d unaẓur Mass Nouredin Ait Sliman, syin ɣer-s, fkan azal i yimedyazen n taddart akken ad ɣren isefra-nsen. Mebla ma ttun tazeqqa n yicewwiqen anda agraw n temɣarin, ṭṭfent leqdic-a. Anect-a, d ayen ara yesbaɛden tatut ɣef yicewwiqen, akken daɣen i d-tella tzeqqa n tira n tfinaɣ i selḥan yiselmaden n tmaziɣt anda ffkan i warrac imecṭaḥ tagnit akken ad lemden tifinaɣ . Yenna-aɣ-d yiwen seg yiɛeggalen n tddukkla d akken: “ tazeqqa-a n tira, nexdem-itt akken ad d-nexlaq assaɣ gar yigerdan akked tira n tmaziɣt taqburt “. Ɣef 11h, tella-d tejmilt i Mass Nouredin Ait Sliman s tillin n uselway n tɣiwant akked yinemhalen n yiɣerbazen. Ma yella tameddit n wass, turar-d terbaɛt n umezgun taceqquft n Muḥya ‘Tacbaylit’’. Tekfa tfaska s ccnawi n yinaẓuren n taddart . Akka ihi i sfuglent tddukkliwin tidelsanin ixef n useggas n Imaziɣen. Mmxallafit wahilen, mmxallafit wadagen anda i d-llan, maca iswi d yiwen, lebɣi d yiwen, ayen yugaren aya d tinekkit ɣer umezruy alqayan n ugdud-a.

Souhila Yamani

Partager