Akken yella deg wahil, ɣef leḥsab n yisallen unsiben i d-yekkan seg uɣlif n daxel, sya ɣer 2020 amur ameqqran n tkarḍiwin n nnekwa ad ilint d tibiyumitrin. Imi tura akka ugar n 33 n yimelyan n tkarḍiwin n nnekwa tiklasikin i yellan di Lezzayer. Ad yeddu waya deg ubrid n uwenneɛ n yiqeddicen d usetrer n wayen i nesseqdac deg tallit n umaḍal umḍin. Am wakken ara tessenqes tigawt-a seg waṭas n leɛtab d uẓuɣɣer i d-yettwaḥettamen ɣef uɣerman yal mi ara yebɣu ad d-yexdem akaɣeḍ-a neɣ d wa. Ahat ayen yesḥissifen ɣef tmuɣli n kra n medden d mi ttɛeṭṭilen cwiṭ lecɣal n uheggi n tkarḍa-a tabiyumitrit, imi tikwal ɣas ad yili yeɣseb bab-is, ilaq ɣef win i tt-yessutren ad yerǧu armi d 20 n wussan neɣ ugar akken ad as-d-tettunefk. « Mbeɛd mi yi-truḥ tkarḍa-inu n nnekwa taqburt, xedmeɣ-d akk ayen ilaqen akken ad i yi-d-ɛiwden tabiyumitrit-nni. Maca tura tetteddu ɣer xmestac n wussan urɛad i yi-d-ssawlen ad tt-id-awiɣ ». I d-tenna yiwet n teḥdayt seg Ayt Smaɛel. Ad d-nesmekti d akken takarḍa tabiyimitrit ur terzi kan tin n nnekwa, maca d ayen iḥuzan daɣen apaspur d tkarḍa n tkerrust. Deg uraǧu n usenqes s tidet seg useqdec d usufeɣ n ukaɣeḍ s umata, imi ɣer sdat aṭas n yikaɣḍen ideblanen ara d-yettmaggan seg internet war ma ɛeddan yiɣermanen ɣer tdeblin yemgaraden i zemren ad ilint guggent fell-as. Daɣen ayendin ara yettazzalen kan deg uẓeṭṭa n internet war ma ffɣen-d d akaɣeḍ. Ulamma akka imir-a, lɣaci i mazal bɣun ad qqimen sɛan tikarḍiwin-nni tiqburin kan.
M. K.