Mkul aseggas, imḍḍebbren n taddart n At Buhuni xeddmen timliliyin n ddabex-uḍar deg-s ttarran tajmilt i yimeɣrasen n taddart-nsen. Timliliyin-agi, tturaren yilmeẓyen yesɛan leɛmer gar 18 ar 35 yiseggasen. Tebda temzizelt ass n 20 yulyu alarmi 19 ɣuct. Larebɛa iɛeddan, imḍebbren heggan-d yiwen n wahil ara yilin di taggara n temlilit gar snat n terbuyaɛ i iɛeddan ɣer umḍiq n taggara.
Timlilit-a, yeḥḍer-itt uselway n tɣiwant n Iɛekkuren d netta i d inebgi n lḥerma. Mi tekfa temlilit yella-d ufraq n warrazen i yimyurar i irebḥen akked wid i ixesren. Rnu ɣer waya, fkan arrazen i wid i d-yewwin akayad n lbak, imi taddart n At Buhuni teṭṭef amḍiq amenzu deg tɣiwant (99% i d-yewwin lbak).
Di taggara n tmeɣra, imdanen ruḥen ɣer tmeqbert n yimeɣrasen sersen tamuqint n yijeğğigen daɣen xeddmen ddqiqa n tsusmi.
Oussaidane Lamia