Thegga-d tddukkla tadelsant “Lumière” n taddart Awrir n At Ḥsen deg tɣiwant n Ukeffadu asfugel n wass n umenzu n Yennayer. Yebda wahil ass n, lǧemɛa 10-01-2020 s yiwen n Karnaval anda i lsan iselsa iqburen n yimaziɣen.
Syin ɛeddan deg yizenqan n taddart s ccnawi iqdimen seg umezruy amaziɣ. Ɣer taggara n wass, yeḍra-d yiwen usarag. Ass n sebt, 11-01-2020, tella-d lweɛda n yennayer i d-thegga tddukkla. Syin, teldi timsikent n yisufar n wučči iqdimen. Ma yella d ass n umenzu n yennayer, d aṣeṭṭel i warrac imectaḥ, wagi d yiwen wansay i yellan yakan deg tmetti taqbaylit. Deg Uxxam n yilmeẓyen n Yiɛeẓugen, llant-d ass n, sebt 11-01-2020 temsikniyin i yerzan idles amaziɣ akked usenɛet n yiwen n usaru i d-yettmeslayen ɣef yennayer. Ɣer taggara n wass, yella-d ccḍeḥ sɣur tddukkla tadelsant Asirem.
Ass n Lǧemɛa di taddart n Taqaɛet, texdem tddukkla tadelsant Tagmat n At Wanec yiwet n temsizelt n Seksu ifazen deg tezrigt-is tis 04 . Ma yella d taddart n At Mendas di tɣiwant n Buɣni s lemɛawna gar tddukkla Tadelsant “Art et culture At Mendes” akked Useqqamu n taddart, heggan-d ahil d amerkanti iwumi semman “Yennayer, d agadar gar umeyi d tilawt”. Yella-d deg-s usarag i d-yesker Mass Amin Zaoui, Djamel Laceb akked Youcef Merahi s useltel : “Littérature et mythologie Amazighes” .
Ma yella d asarag wis sin, yewwi-t-id Mass Youcef Mehri akked Adbelaziz Mehdi s usentel : “L’environnement et la préservation dans la culture Amazighe” .
Yamani Souhila