Seg useggas n 2007 i yettwajerred usenfar-is, maca kra n tlufa n syinna ed sey-a gant amek ara yili usnulfu n uɛeṭṭel, n uḥbas seg tikkelt ɣer tayeḍ, almi ttɛeddayen yiseggasen ttawin kan yid-sen asirem iɛelleq n yibabaten n warrac, n yinelmaden, ed yimezdaɣ n tɣiwant n Ayt Smaɛel akken ma llan. Maca taggara-ya yekker uneɣmis i yesferḥen akk tuddar n tɣiwant, i d-yeqqar dakken iqeddicen n tesnawit-a tamaynut atan ɣas ini kfan, yettusemma thegga akken ad tesnubget inelmaden n kraḍ n yiswiren n tesnawit (aseggas amenzu, wis sin ed wis kraḍ) i tuɣalin n tɣuri i d-iteddun deg ctember-a n sdat-neɣ ara d-yawḍen seld imuras n unebdu. Dɣa, ɣef yisallen i aɣ-d-ileḥqen taggara-ya, ttwaceyyɛen-d yakan ddeqs n dduzan swayes ara yettwaldi uɣerbaz-a amaynut i useggas aɣerbazan 2015/2016, am ṭṭwabel, ikursiyen akked wallalen nniḍen i yessefken i teldayt tunsibt n tesnawit-a. Ad d-nesmekti dakken aṭas i yuzzlen d awal yeḥman tikkelt iɛeddan gar yimeɣnasen n yikabaren imḥaddiyen asmi i d-terza tneɣlaft n usegmi massa Nuriya Benɣebrit ɣer Bgayet ed Suq Letnin larebɛa aneggaru n mayu yezrin maca ur d-tewwiḍ ɣer Ayt Smaɛel akken yella yetturaǧu, yuɣ lḥal, sɣur yimḍebbren n tɣiwant. Ula d kra n yimezdaɣ n Ayt Smaɛel aṭas i mesteqsan ɣef sebba tidettit i yeǧǧan taneɣlaft-a n usegmi ur d-tusi ɣer Ayt Smaɛel akken ad tɛeyyen s wudem unsib taldayt n tesnawit-a i ctember i d-iteddan. Daymi tuɣal taluft-nni ussan-nni d asentel n kra n win i imalen i uḥric-a n tɣuri deg taddart. Ilaq ad d-nerr awellih dakken annect iḍul usenfar-a n tesnawit d ayen ur dman yiɣermanen n tɣiwant, almi i d-yesnulfa kra n yiɣilifen deg wagnes n wid akk terza taluft. Yuɣ lḥal, ula d inelmaden ilemẓiyen sɛeddan iḥeyyaren seg ddiq n tesnawit taqburt Maɛuc Idris, almi ihi i d-ufan meqqar tamentilt (sebba) i usnulfu n wuguren wiyaḍ s tiganin (grèves) idumen, i ten-iḍurren ur ẓrin. « Mačči d ayen ur nennum taluft-a n uɛeṭṭel n lecɣal. Maca tura mi thegga tesnawit-a-nneɣ, nessaram kan ad yili qabel d aseggas war uguren i warrac-nneɣ ». Aya yenna-aɣ-t-id yiwen n ubabat seg Ayt Smaɛel.
Mhenni Xalifi