Asmi d-luleɣ, sbedden-d ajenwi nnig n dduḥ-iw, nnan-d : «Cehhed ! Ddu d ddin-ik, uɣal d ineslem» s ddreɛ, mebla ccwer, mebla lebɣi.
Asmi meqqreɣ, gziɣ timsal, mmugreɣ-d ddiyanat nniḍen, maca yiwen ur iyi-d-yemmeslay fell-asent, ama deg uxxam, ama deg uɣerbaz…
Aselmad-iw yeqqar-d : «ineslem n diri axir n lkafer n lɛali».
Asmi meqqer, nnan-d ilaq ad tt-uẓumeḍ aggur. Nnan-d : «wagi d aggur n rreḥma»
Uqbel ad d-ibin waggur, tulli ssuma di kullec.
Iban-d waggur, yekfa ccek. Azekka ad yebdu waggur n Remḍan. Imdanen d aɛezzar alamma d lawan n sḥur azekka-nni ad tt-wwten d iḍes ass kamel.
Tameddit imi ara d uɣaleɣ deg umahil-iw, ttmagareɣ-d imdanen ssuḥuben iman-nsen d asuḥeb, ttemderkalen deg ubrid am wid-nni isekren, iḍarren teddun, allaɣen ṭṭsen. Inyiren kersen, teǧǧa-ten taḍsa. Ifadden kkawen, iqudam d iwraɣen, allen d tizeggaɣin ctaqent iḍes. Alamma feqɛen kan ara t-fiqeḍ belli ukin, imiren ad tt-naɣen ad tt-suɣun.
Lɣaci amek i as-ɛeddayen lweqt-nsen ? Deg wuzal, irgazen ass kamel d iḍes, ma d tulawin ass kamel di tenwalt. Deg yiḍ irgazen tt-uraren Duminu, lkerṭa aked luṭu, tilawin zdat n tiliẓri tt-ferriǧent isura n Yimasriyen. Yal ass lhem yettkemmil.
Kra ara yekker waggur n Remḍan, lɣaci tt-ɛassan ccix n lǧamaɛ melmi ara yadan.
Yal yiwen s wacu yettruẓ Remḍan-is, wa s zlabiya, wa s ttmer d uyefki… Imir-nni ad aɣlin ɣef učči, ayen yellan ad ɛeddin fell-as, alarma qerẓeẓin. Mi ččan rwan ad nnecraḥen wulawen. Ad uɣalen ad ttaḍsan, ad d-uɣal tudert udmawen.
Bussaɛd Ḥemar