Tala n wawal issem-is aḥeqqani Laldja Bughdad, d yiwet n tmedyazt taqbaylit, tlul ass n 21 dujember 1972 di taddart n Yiwaḍiyen, lεarc n At Laεziz, lwila n Tubiret.
Seg temẓi-s tekcem γer tebḥirt n tmedyazt anda i teẓẓa tikta-s, tamusni-s, tleqqem imeslayen-is, tga tamda swayes i d-teččur acḥal d amud n yisefra. Asefru-s amenzu turat asmi tesεa 18 n yiseggasen ittmeslay-d γef tmaziγt maca war asentel. Seg lawan-nni, tẓemmi allaγ-is almi teṣaweḍ deg seggas n 2004 tesuffeγ-d adlis amenzu n wamud n yisefra s usentel » Tiγri n Tayri » deg tezrigin n « El Amel » n Tizi-Wezzu, tazwart-is yura-tt Youcef Merrahi, amaray amatan n Wesqamu Unnig n Timmuzγa.
Leqdi-is ur yeḥbis-ara dagi kan, acku g seggas n 2006, tesuffeγ-d adlis wis ssin n wamud n yisefra s degs n yisefra s usentel » Timeqwa d isekkilen », deg tezrigin n » El Amal » s tezwart n Mohamed Djellaoui.
Tala n wawal tukka deg waṭas n tfaskiwin, amedya n tfaska n wedrar n fad, itri adelsan n Weqbu, Numidya n Wehra, Si Muḥend wemḥend d yusef uqasi d faskiwin niḍen. Tala n Wawal tewwi deqs n warazen, am waraz amenzu n temzizelt n umenzu numember deg temnaḍt n Tubiret i d-suddes tmenhalt n yedles n lwilaya n temnaḍt-a. Tewwi araz n tmeṭṭut deg At Smail (Adrar n Fad), γer-s araz wis ssin deg tẓuri d yedles n Lzzayer tamanaγt.
Tala n wawal tessewjed ssin n yedlisen imaynuten ar ad-yefγen γer zdat, yiwen s usentel » Tamacahut n Lzzayer » d amud n yisefra anda i d-tella tsuqilt n yiwen n usefru γer tutlayt tafransist i d-yessuqel Soussi Boualam n temnaḍt n Bgayet, tazwert n Kamel Bouamara. Ma yella d adlis wiss ssin n wamud isefra s usentel » Inni-y-id, mmel-iyi-d « , tazwart n Said Chemakh « .
Tala n wawal, tessaram d akken idlisen-is tesuffeγ-iten-id si ṭlam γer tafat, seg tama niḍen tessarem dakken tamedyazt-is a d-tesεu lfayda i kra n win ar as-yeslen, syen daγen tessarem aṭas akken tameṭṭut a d-tesεu izarfan-is akken iwata. Γer tagara tbud asefru-agi tenna :
Waḥdaγ deg ugeffur yekkaten
Aman yewwi-ten-id usigna
Imru yebda imeṭṭawen
Imeṭṭi-s tezram d timeqwa
Timeqwa seγlayent-d iskkilen
Mi dduklen uγalen d tira
Tira tuγal d imeslayen
Imeslayen uγalen d isefra.
Islam Bessaci