Am wakken i d-ttilin warmuden (activités) s wazal-nsen yal ddurt deg Tmurt n Yezwawen, ayen i d-yellan taggara n yimalas yezrin deg Yiḥeddaden ed uxxam n yidles Ṭawes Ɛemruc d yiwen seg-sen. Aya, mi yerra unalas-amedyaz Fares Idir s « ih » i uɛraḍ n Tdukkla Taɣect n Ugrud akked n Tdukkla n Yimuḍan n Uqerruy i iqeddcen deg waɣir n Bgayet, iwakken ad asen-d-yawi kra n tmucuha seg ugerruj aqbur n yimaziɣen, ed swayes ara ten-iger s uwenneɛ deg umaḍal n tirga, asugen, ed talwit. Yuɣ lḥal, am tikkelt iɛeddan mi iga amlaqi deg Sid Ɛli Lebḥer lwaḥi ed yimuḍan nniḍen ilmend n wass agreɣlan n yimeɛḍar, Fares yesmurres (il a réussit) ula tikkelt-a taneggarut mi yessaweḍ yessekcem imuḍan deg umaḍal-nni icebḥen rnu yessenṭeq-iten-id yal wa s tigawt-is, akken ad d-yeg tasedmirt (réaction). Yezuzzen akken iwata arrac imecṭaḥ i as-yettḥessisen s tmucuha yettwassnen yecban «Mḥend Uccen» neɣ d «Belɛejjuṭ», akked wunuɣen deg tferrawin ed ubendayer deg yifassen. Deg teɣzi n wakud, analas Fares Idir yewwi-asen-d s telqey akk ayen yeḍran deg tmucuha d ayen i d-ijebbden awellih s temsirin-is n tudert yemgerraden. Kraḍ n ttiɛadat dɣa i iga Fares gar Aweqqas, Iḥeddaden, ed uxxam n yidles n bgayet seg umhad 11 deg yunyu almi d sed 13, gar-asen wid yebda seg tsebḥit almi d tazeggant n wass, wiyaḍ yebda-ten mi yewweḍ ureqqas n temrint (ssaɛa) deg 13sr, kfan mettwal tameddit tamzikt. «Am temliliyin akk n usiwel n tmucuha i ttageɣ deg waɣiren yemxalafen n tmurt i ɛeddant tid n ddurt yezrin. D acu kan, tin n warrac imuḍan deg Yiḥeddaden tella d tuzzigt i nekk. Ladɣa mi d-ttafaren akk tigawin xeddmeɣ, am ccna ed tiyita n ubendayer. Ma d tin n uxxam n yidles Ṭawes Ɛemruc, akked usiwel n Uweqqas i d-giɣ i tlawin tseqqef am akken ssaramen yimeḥḍar». Akka i aɣ-d-yenna yilemẓi analas Fares Idir.
Mhenni Xalifi