Si Tala Bounane ar Tala Athmane

Partager

D acu yettwaqaddren ɣer yiqbayliyen nnig tala-nsen, tala ansi i d-ttagmen aman i tudert-nsen? Ihi, i wakken ad rren imezdaɣ n taddart n Tala Athmane tajmilt i ucennay ameqqran Matoub Lounes, kkren bnan-as tala deg yiwen urti n lqahwa u semman-as ‘’Tala n Matoub’’. S leqdic am wa, bɣan ad d-beggnen d akken Matoub d tala, d aɣbalu ansi i d-ttagmen medden timussniwin, d tala anda i tekksen yilmeẓyen acayaḍ i tayri-nsen, d aɣbalu ansi i d-ttliqqimen imeɣnasen amennuɣ-nsen. Matoub d tudert s timmad-is. Akken i as-yenna deg wawal-is ‘’Xas neqqḍen acḥal d itri, igenni ur negger ara’’. Akka,ihi, xas akken nɣan-t ’’yiɛdawen n tudert’’ deg Tala Bounane, ilul-d deg Tala Athmane. Ilul-d i lebda : tasuta teǧǧa-t i tayeḍ imi tura ur yezmir yiwen ad t-ineɣ. Yak qqaren Wat zik ‘’Win yebɣan ad yidir, yemmet !’’ S ufella n tala-a, reṣsant tlata n tugniwin n Lwennas : ansi i as-d-tekkiḍ, ad tent-id-twaliḍ neɣ ɛad d netta ara ak-id-iwalin. S ddaw n yal tugna, yella wanay amazigh (drapeau) anda yura ‘’Ṭṭef deg tjaddit, mmeslay taqbaylit’’. Ass-nni n 24 deg yunyu, ɣef 12 n yiḍ, i d-yella uskan n tugniwin-a s wudem unṣib sdat n yimezdaɣ n Tala Athmane i d-yusan s waṭas i wakken ad ttekkin, ula d nutni, deg tejmilt i as-yuɣal i Le Rebbelle. Amek ur ḥeddren ara, nutni i igan tikli deg useggas n 1994 si Tala Athmane armi d Tizi uzzu i wakken ad ḍelben s userreḥ n Matoub asmi i t-ṭṭfen yirebraben ?. ‘’Ayen i as-nexdem, drus. Yuklal ugar n waya. Yefka tudert-is i tmaziɣt d tugdut.’’ I aɣ-d-yenna Ferhat, mmi-s n bab n lqahwa anda i d-tella tala-agi. Ma d Nadir, ikemmel yenna-d : ’’ayen yelhan, d akken ilmeẓyen akk ḥemmlen Matoub xas akken ur t-ssinen ara. Yella usirem, akken i as-icaṛ’’

Ihi, ‘’win i as-yennan lexla yexla, i yexlan siwa netta’’.

Hocine.M

Partager