Aṭas i llan ttraǧun seg wid iḥemmlen tigejdit-a n ccna azwaw ad walin muggen, ffɣen-d dayen sin n yisura-nni iɣef tella tessawel-d Malika Meɛtub tazwara n useggas n 2013, ed ideg d-tluɛa kra n wid iḥemmlen anaẓur-a, kra n wid yellan d imekdiyen-is, neɣ s umata kra n wid iḥulfan iman-nsen d imeɣnasen, ad ttekkin deg twizi-nni ulama s ddrur n tedrimt. Axdam-a n sin n yisura n Lwennas n Ayt Lewnis – yiwen ɣef ubaraz-ines (concert) awḥid, win sin ɣef umecwar n ccna i d-yewwi – yella yehwa i waṭas n Yizwawen ed Yimaziɣen merra skud ad asen-d-tas tegnit ad walin ttiɛadat n ccna n unaẓur s tɣara igerrzen DVD, rnu ad walin ahat kra n tugniwin i ur ẓran, neɣ d ineḍruyen s wazal-nsen deg tudert n Lwennas.
Imi acennay-a anaẓur bu taɣect yesdegdigen yekcem yakan taɣlalt (éternité) akken i t-id-yenna, rnu daɣen acḥal i yellan ulac-iten, wiyaḍ ulac-iten llan. Asura-ya yella ad yesɛu azwel«Meɛtub Lwennas, isem-iw amennuɣ», d asenfar i yellan ad yili, akken i d-nnan deg tvidyut-nni, s tdukkli gar Tesbeddit Meɛtub Lwennas ɣef yixef-is uletma-s n uɣewwaɣ Malika Meɛtub akked Tfarest n Mathurin. Lameɛna, gar taggara yettwanɣel, neɣ ad d-nini yettwasselḥem ɣer wazemz wayeḍ usenfar-a, skud am wakken nezmer ad nɣer deg usebter amezwaru n wadeg i d-yennulfan i walmend n yisura-ya (matoublouneslesfilms.com) : «tesḥassef terbaɛt n Meɛtub Lwennas isura ad awen-d-tesneɣmes dakken ur nessaweḍ ara ad naf infarasen ara d-yesneɛten ahilen-nneɣ, ihi ulac ddeqs n tedrimt bac ad neg sin n yisura-nni i nella nettmenni ad awen-d-nesken…». Seg tama tayeḍ, yenna-d yizen-nni dakken asaru n ttiɛad n ccna n Meɛtub Lwennas deg Zinit n Pari, atan ihegga, ihi ad d-yeffeɣ sey-a ɣer sdat. Nessaram ad uɣalen wid i d-yesnulfan tikti-ya ass amenzu, ad xemmen ɣef usenfar-a igerrzen, imi war ahat wid iḥemmlen amdan-a bu tidet dima heggan i tal tallelt.
Mhenni Xalifi