Ugar n waggur tura seg wasmi ḥebsen yiselmaden yeddan d Cnapest ɣef lxedma-nsen deg lwilaya n Tizi Uzzu.
Yebda uneḥbus-nsen seg wass n 20 unbir yezrin imi i as-tefka yiwet n tpulist abeqqa i tselmadt daxel n tenmehla n usegmi n Tizi Uzzu, yerna sdat sin n yimḍebbren, ɣef wakken i d-nnan. Seg yimir, yessutur sandika Cnapest astixer n sin yimdanen-agi imi ur ‘’ḥudden ara taselmadt-nni u ǧǧan-tt tettewwet sdat-sen’’, ɣef wakken i yessuffeɣ awal sandika-agi. Syin, yella-d uneḥbus ɣef lxedma, llan-d yinejmuyaɛ sdat n Tenmehla n usegmi akked sdat n lwilya, am wakken i d-tella tikli d ibeddi sdat n Uxxam n lwilaya, ddurt iɛeddan. Deg tmesbanit-agi, dɣa, i d-iɛawed sandika i tikkelt-nniḍen asuter-is. Yenna-d ur ttuɣalen ɣer uɣerbaz alamma ttwastaxren sin yimḍebbren-agi. Seg tama-nniḍen, temgarad tmuɣli n Tenmehla n usegmi n lwilaya n Tizi Uzzu ɣef tedyant yeḍran. Nettat, tenna-d yesskiddib sandica-agi n Cnapest, mačči d tidet ayen akk i d-yeqqar, u d netta i yettcudden timsal imi yettagi ad ittekki deg tsequma n umtawa i d-tettheggi. Ula d imawlan n yinelmaden, tecɣeb-iten temsalt-agi n uneḥbus ɣef leqra, imi iɛedda tura waggur ur ɣrin ara warraw-nsen. Akka dɣa i d–tessuffeɣ yiwen wulɣu tfidiralit n tdukliwin n yimawlan n yinelmaden n lwilaya, anda i d-tewwet s leqseḥ deg Cnapest imi yeǧǧa taswiɛt texxerxer ar tura. Ɣef wakken tettwali tfidiralit-agi d akken tifrat ha-tt-an gar yifassen n Cnapest, ‘’D netta uɣer tella tifrat, imi d netta kan i yugin ad yekk deg yal tasqamut n umtawa i d-yettilin. U d netta i yugin akk ayen-nniḍen’’. I d-yenna Mass Lahcène, aselway n tfidaralit-agi. Ɣef wakken i d-yerna, yezmer ad ḥebsen ula d nutni arraw-nsen ɣef leqraya ma yella ur uɣalen ara yiselmaden ɣer lxedma mebɛed imuras-agi n ccetwa.
Hocine Moula