Ussan n tmedyazt n At Wasif id yellan, di tadwilt-is tamazwarut , dduṛt yezrin deg At Wasif s ddemma n tɣiwant n At Wasif akked usqamu unig n timuzɣa, ibegned i tikelt nniḍen d-akken terwa n umedyaz Lḥaǧ El Muxttar ɣef id yerna Ben Mohamed, Belḥanafi, Mourad Rehmane mazal-iten d at wawal yerna ressan deg akal yellan d aɛrqub n wawal.
Azal n tlata wussan tuzzel tmedyazt ddaw leɛnaya n taleṭṭaṭ id yefken tameẓẓuɣt i wayen n thuski, n ccbaḥa n tmenna, n sser n tugniwin, akked d talqay n usekkud. Ussan-a n tmedyazt yellan d tajmilit i ucennay Slimane Chabi, yellan diɣ d-smekti n bab n wawal lḥaǧ El Muxtar fkan-d irebbi i wazal n 60 imedyazen id yekkan si yal tama n tmurt n leqbayel (Bgayet, Tizi, Tubiret) akked imedyazen imaziɣen id yekkan seg udrar n ccenwa akked Chlef. Kra n win iḥedṛen yedda di nexsma n wussan-nni acku ayen yuzlan d tamedyazt deg imi n imedyazen yefka d ttbut d akken awal n Si Muḥend U Mhend iccuq tignewt akken, war tilas, ad yeɣzu annar n tidmi, ad yezwi tindaw ɣef umyag aqbayli akken ad iɛebbi timessalin n tudert s umata d tid yellan d tuɣrsin yeqqnen ɣer lhejna n tidmi akked tinfit (esprit). Imedyazen am Ahmed Lehlou, Ahmed Khattabi, Aba Farez, Selmi Moussa, Dali salima, Cheli Leila, Sadi Kaci d wiyad ssawḍen tamedyazt taqbaylit ɣer yiwen yiswir ɣef werǧin nebni ma nsukk tamuɣli ɣef iseggasen yezrin.
Mebla ccekk imedyazen-agi d ixulaf id yefrurin seg useklu n tsekla taqbaylit swan s tidi n lmux-sen imedyazen am Youcef Ou Kaci, Ccix Muḥend u Lḥussin, Si Muḥend u Mhend, Slimane Azem, Lala Xedija Tukrift, Lounis Ait Menguellet, Ben Mohamed, Mohya, Matoub Lounes, Zdek Mouloud. Ɣeff aya yezga-d yesɛeb ɣef tseqqamut n waktazal akken a tani gar imedyazen-agi, anwa ara yawin arazen id ttuhaggen s ddemma i timzizlit am akken id yenna Mass Halwan Ḥasen aselway n tseqqamut. Maca imi ayen ilaqen ilaq, arazen ttunefkan i xemsa n imedyazen : Sadi Kaci( Arraz wis xemsa), Cheli Leila( arraz wis rebɛa) Ahmed Xeṭṭabi ( arraz wis tlata) Selmi Moussa (Arraz wis sin) Dali Salima arraz (arraz amenzu –lḥaǧ El Muxṭṭar). Ayen yeṭṭfen lbal diɣen deg ussan-a n tmedyazt n At Wasif, d tajmilit yuɣalen I Slimane Chabi id yewwin ayen din d-isefra d imaynuten yesferḥen izumal n wid id yussan akken ad as sslen yerna as rran tisemɣert. Ala win ara as yinin ayuz i unaẓur-nneɣ id tezzin deg imawen n imayaten n wid iḥadren i leqdic-nni. Si tama nniḍen Ahmed Lahlou yeɣṛa-d isefra-ines yesduqqusen ulawen dayen id yernan deg azal n temlil it-agi n at wawal deg akal n at wawal. Tamugent tettunefk i yimedyazen ass-n n 5 Ɣuct deg at Ziki Akked deg ussan n 22/23/24/25 Ɣucut I tadwilt tis maraw sin (12) n wussan n tmedyazt Yusef U Qasi d Si Muḥend U MḤend .
Ait Slimane Hamid