Tafaska tis 12 n Iwennan naγ ḥkku-d taẓuri “Raconte-arts», teldi tiwwura-s s wudem unsib ass n 24 almi d 31 di yulyu di taddart n Yigersafen taγiwant n At-yeğğar γef teɣzi n 08 wussan. Tafeska-agi tsuddes-itt-id tdukla n tẓuri n sinima n Tizi Wezzu, s lemɛawna n usqamu aγarfan n ugarzu n Tizi-Wezzu, taɣiwant n At-Yeğğar akked imezdaɣ n taddart n Yigarsafen. Tafaska agi ussand ɣer-s deqs inaẓuren, nnig n 300 n yinaẓuren izzayriyen xarṣum wid n tmurt n leqbayel d wid n tmura n lbarani id-yussan di Fransa , kamerun, Tunes d tid niḍen. Ahil n leqdic d amerkanti, anda llant temzikniyin, isaragen, isura, ticeqqufin n umezgun, timucuha, tamedyazt, ccna, timliliyin, uraren deg yiberdan akked yizenqan. Iswi n tfaska-agi d asnerni d unegmu n yidles amaziɣ d win n umaḍal, d umbadal ger tγarmiwin. Asentel n tfaska-agi d “Ger Yiḍelli d wass-a, Aḍar iteddu d Tara”. Tafaska ḥkku-d taẓuri yes-s ay d-tbedd tejmaεt n taddart n Yigarsafen anda iḥedren merra yimezdaɣ. Ḥasen Metref aselway n tdukla Inaẓuren n Tizi Wezzu yesefhem-d iswi n tfaska-agi, u yerra tajmilt meqqren i taddert n Yigarsafen i iggan irebbi i leqdic-agi, imi d yiwet n taddert id-yefkan amedya di tezdeg n twenaḍt di tmurt n leqbayel sumata, anda i tewwi arraz n taddert zeddigen di Tizi-Wezzu, n useggas 2014. Syen tasqamut n taddert n Yigarsafen rran tajmilt i kra n win i d-yusan ɣer tfaska-agi. Anazur Denis Martinez, yerra tajmilt i kra n wid iqedcen γef tfaska-agi i yettnarnin deg seggas γer wayeḍ, imi wa yettagem wa yettajew di tẓuriwin yemgaraden n umaḍal.
Islam Bessaci