Argaz d win i sen-t iceffun. Tudert d tuqqda n yixf. Ijujaḥ, yesmendig wakud, ilehben nnig yiri nnḍen si yal tama ɣef iman yettlejlijen s talwit xas ulamma talwit d awal-kan. Acu umi yezmer ufexxaṛ deg irebbi n tmes? Acu ara d yexdem uḥaber deg ufezqi n layas? Asirem yettrebbin taqlest tilist-is d tiderrit n tilawt: xuḍi tilawt –nneɣ nekni s iyennaten agi testewḥec. Argaz d win i sen-t iceffun, win ur n ceffu ulac ttkal fell-as, ḥesbet-it kan d taseṭṭa ur nerri tili neɣ d kalitus teɣzi ur yeǧǧi lfayda ur telli! S kra n win yettun ayen iɛeddan fell-as d awezɣi ad yektil s lqis i wayen ara d yennulfun. Amdan am win d war lexṣayel, xas err-it ɣer lmizan fessus. Tudert ur telli d anamer lemmer id ak terbiḥ ay ul: tudert d asurif, d tamuɣli, d-ameyyez uqbel anneggez. Yettɣaḍ win yegren iman-is ɣef wasif netta lɛum ur as yessin: Xuḍi asif-nneɣ yeḥceṛ, yeskerkir iftaten n tamagit-nneɣ, war aḥezeb neɣ a ḥader si lǧiha-nneɣ. Argaz d win ɣef iɛeddan-t, d win xas yeɣli yufa amek ara d yewet s ugerrz. Argaz d win yecban aseklu xas yeɣli yifer yedder uẓar. Acu ara d yexdem ugeṭṭum ffɣen waman? Acu umi yezmer umalway yeɣlin si gar ifassen? Acu id lfidya uqejmur nehren qamen? Tayerza n wenyir d amezruy i wid yeẓran… maca ur d teqqim ara deg tira imi wid ara d yesneṭṭqen tira werǧin llin. Iɛaklen negren neɣ ɣaben? Izemniyen ccḍen neɣ grarben, yedda lqum ɣer lemqam ziɣ di lemqam id yufa lemnam. Hum u ɣum Ṛebbi aɛziz lebṣel qreḥ is yenna wanzi. Deg akken gten lehḍur allaɣ ara ten-yegzin yewet-it wazi. Xas merruyet ɣef akal yenqed. Tufa lebɣi-s tamaggirt, yerra-aɣ lḥawj ɣer tiririt n yifeẓ.. Xuḍi nettfeẓẓa ilem akken a d yedhu yimi. Nseblaɛ abeḥri akken ad yettu uɛabuḍ aganni . Nmecceḥ iɣden akken ad ttun yicenfiren ḥaruq. Ɣef tuqda n lasel nerna tuqda n lbaṭel..dɣa kra nenwa yebṭel, kra nurǧǧa yeɣfel: xuḍi araǧǧu d teɛkemt n wungif, amenni n asijjew n uɣilif, aganni d lexṣla n lqum ur neɛrif! Lhem yessen abrid ɣer bab-is, bab-is yessen ad is iger irebbi-s. Din I tufa iman-is tagda( equation) ur n ferru. Ktil, qis , seḥseb ay anda yedda ujeriḍ taggara-ines d tunnḍa. Tunnḍa d lxeṣla n uzrem, azrem d lhiba tuffirt, tufra d addari n leɛyub. Ala win umi fsin ifadden I yettmurruden zdat tunṭict. Maca ɣef zher-nneɣ amcum deg ayla neddem tunṭict, deg tunṭict neḥwes takemmict. Yelha usendi deg urawan… imi igenni d timiqqwa-s iɣ yessuṭuḍen: xuḍi taɣzint tekkaw aɣeddu n tmussni sellaw nedda di zedwa n uḥerbebbu armi iɣ yuɣal ccna d ahruḥu! Yeqqed wayen yeqden. Aḍu n lḥif yewwid iludyan n uɣilif. Muqel zelmeḍ ziɣ idehem-it yeffus, muqel yeffus ziɣ iluqeb-it zelmeḍ, kerneni, berneni yexleḍ lḥebb d-ukerfa armi ineggi ukufi d ṭṭlaba. Ayen i treqq teftilt deg uḍan n lqum yesfugglen ṭṭlam? Ayen i-izher usefru deg ṛeḥba anda lqum yeddel tasusmi? Ayen tetteqliliḥ tussna deg ugni anda lqum yeɛbed leqniɛa ? Ayen iḥar yiles ɣer timenna deg tallit anda lqum yesmenyaf leɣṛuṛ n yir tirga? Xuḍi targit-nneɣ d yir netta-t, lmenṭaq-nneɣ rẓag am qlilu, sbeṛ –nneɣ yezzuḥub ddel , tigawt-nneɣ d amɛnter, tikli-nneɣ d asḥurejdel, tezla-nneɣ yif-itt fiḥel… hum u ɣum Ṛebbi aɛziz lebṣel qereḥ is yenna wanzi. “Nekni s leqbayel” n tettu is yenna uɛabaj n wawal…”xas nettaɣ-iten-t negguma a necfu” id yenna daɣen… ulamma ixf yettwaqqed… ulamma timdit tenɣed, ddel deg ulawen-nneɣ yessed… yeḥḍem.. ur igezzem ur iqarṛem… akka id teḍṛa d lqum ur nessin melmi id tuzzma melmi id llum.. ihum kan hum, ɣum kan ɣum wicqa lebṣel ma qerreḥ!
Ait Slimane Hamid