Zik-nni asi terwa tmurt yerna ulac takerḍa, yal yiwen s tqeṭṭiḍt-is. Yečča lmal yefreḥ bab-is. Tusa-d tallit deg-i telluẓ teswiɛt, uɣalen kksen-aɣ aksum. Cwiṭ-nni i d-ttawin xedment i teccuyt i wakken kan ad yiziḍ useqqi. Mi yewwa ad tebḍun gar-asen agad isewwayen. Ma d nekni s imuḍan n sett aseqqi d waɣrum. Yiwen wass, ɣefflen agad isewwayen akken, seddan taqeṭṭiḍt-nni imi ɛemren i yimuḍan. Imuḍan-nni faqen-as gubren-tt akken ma llan, yal yiwen yebɣa ad t-id-siḥ. Wa yettawi amḍiq n wayeḍ, wa yettbeddil taḍebsit n wayeḍ, ttnadin ɣef tqeṭṭiḍt. Taqeṭṭiḍt tamcumt tesker harwel. Wa yekkat wa, ma d taqeṭṭiḍt yiwen kan id tt-yeččan. Rfan imuḍan mačči d kra, nnejmaɛen din-din. Mmɛezbaren, tagara msefhamen ad ceggɛen yiwen dg-sen ɣer unemhal ad yehder yid-s s yisem n yimuḍan. Taren-d yiwen, cuffen-as aqendur… -Kečč tesdukkleḍ tamusni d lefhama. Ad tt-ruḥeḍ ad tt-ssutreḍ izerfan-nneɣ. Ad nili deffir-k, aql-aɣ yid-k am yiwen ur ttagad ak-neɛɛiwen. Iruḥ umuḍin-nni bu nniya ɣer unemhal, ur as-d-yessemḥes ara. Winna yerẓa aqerru-is. Dɣa anemhal-nni yessawel i yemsulta, cuddent s snesla, wwint ɣer lḥebs.
– Tagi warǧin teḍri deg umezruy, ala imuḍan i d-yeqqimen ad rẓen iqerray n yemḍebbren akked yemsulta. Imuḍan-nni imi sslan s wayen yeḍran, rfan aṭas, uɣalen ad nnejmaɛen. Bdan ttemsawaben, yal yiwen yefka-d rray-is, ɣer taggara unejmuɛ, fernen-d yiwen n umuḍin nniḍen akken ad iruḥ ad iẓer anemhal. Nnan-as :
– Kečč tesɛiḍ nnif akked tirugza, ala kečč i yizemren ad tt-ḥebseḍ cedda-aya.
Iruḥ umuḍin-nni ɣer unemhal, yebda yettmeslay-as yessṭebṭub ɣef ṭṭabla :
– Nekkini neɛya di lbaṭel, aɣ-d-ffkem izerfan-nneɣ neɣ ma ulac ad nesker tagrawla.
Xezren yemḍebren, meyzen, walan mačči d yiwen ad tegren ɣer lḥebs.
– Kečč teḥliḍ mačči d amuḍin. Di zzin tifeḍ aferteṭṭu, di sswab tɣelbeḍ bugaṭu. ad k-nefk axxam, ak-neɛɛiwen, ak-nezweǧ akked tinna ay tebɣiḍ.
Fkan-as aksum, ccrab, lfakya… Yečča alarmi yeqber. Yuɣal yettu akk ɣef wacu i d-yusa.
Imuḍan mi sslan ayen yeḍran, zaden wurfan ɣur-sen. Nejmaɛen, wa yenna-as ad nexdem «la grève», wa yenna-as ad nexdem timesbaniyin, wayeḍ yanna-as ad nexdem «un suicid collectif»
Dɣa yekker-d yiwen ɣur-s yenna-as :
– Kečč thebleḍ, teččiḍ lekwaɣeḍ-ik.
Di taggara mmsefhamen ad xedmen tamesbanit.
Uran ibeḥnaq s trumit. Bdan tikli di sbiṭar alarmi d «la wilaya», ttsuɛun : «Nebɣa aksum ! Neɛya di lmaqarun !»
Lwali mi yeẓra imḍebren n syndicat n yimuḍan, yenna-asen :
– Tikli-agi-nwen teffeɣ abrid n lqanun. Acimi ur turim ara ibeḥnaq-agi s tutlayt taɣelnawt ?
Boussad Hemmar