Ɣas ma mačči d addad i yerzan Tamurt n Yezwawen merra, maca xersum deg kra n tamiwin, am tɣiwant n Ayt Smaɛel deg unẓul-asamar n Bgayet, iban-d uzemmur d win i ten-yuɣen ciṭṭuḥ ma nwala-t nerna nesserwes-it i win n yilindi deg tallit-a. Seg uɣilif-a i d-yellan, d ayen i yeǧǧan at ṭṭjur-a n yigumma yeswan ttwalin kan sḥissifen, skud sdat n ugama ɣlin, ur zmiren yettusemma ad d-gen acemma alama i d-tewweḍ teswiɛt n ulqaḍ gar-aneɣ-d kra n wayyuren kan.
D ameslay ɣef uzemmur, rrant akk wallen ddhen belli d aɛeqqa-yis i yeččan tiyita tageɛmirt, mi d-iban amzun yebberfeḍ s kra n tḥebbuyin akked yimexjan daɣen. Deg waya, ɣef wawal n wid ijerrben, llant snat n tsebbiwin i izemrent ad ilint deffir waṭṭan-a n uzemmur: aha d tizit-nni i t-yekkaten lawan n tsemhuyt-a am kra n tikkal, neɣ d aɣamac-a yessenzafen i t-yeǧǧan ur yesbir. «Yesḥissif mliḥ waya mara ad teẓreḍ azemmur yurew xir n yilindi, lameɛna yuḍen mačči am wakken nessarem». I aɣ-d-yenna yiwen n umezdaɣ n temnaḍt. Yettbin usḥissef deg wudmawen ma neẓra dakken d akukru ameqqran i izedɣen medden, win n terẓeg n zzit ara d-yettwabrin, ladɣa ma ur caḍent teckarin deg tasirin n zzit, neɣ lmaɛesrat.
Yuɣ lḥal, ula d tiẓurin ddant ussan-a deg yilsawen ɣef waṭṭan-nsen ur nettwadma. Rnu nutenti teḍra-yasent am tid yeṭṭfen aṭṭan d amaynut, skud ur yettcabi win n tzemrin wala win i nessen ɣur-sent deg yiseggasen nniḍen, mara xessrent neɣ tteɣlayent-d ɣer tmurt. Tikkelt-a, kemcent d akmac almi i d-ttbanen yiɛeqqayen-is amzun tesreɣ-iten tafukt, neɣ wwan ɛeddan seg uqebli yezrin i qrib yewweḍ tafesna n 50° deg tili.
Mhenni Xalifi