Idles amaziγ d win yettnarnin deg useggas γer wayeḍ di tmurt n leqbayel, xarṣum di 04 n tγiwanin tesεa temnaḍt n wizgan deg ugarzu n Tizi-Wezzu, ger-asent Wizgan, At-Zikki, Illulen Umalu akked At-Yejar, i yefkkan azal meqren i yedles d tẓuri.
Taγiwant n Wizgan tuγal d tamanaγt n tfaskiwin, imi yal seggas tesdaray-d 04 n tfaskiwin yemgaraden, am tfaska n ukkarmus di taddert Sahel, tafaskan n ubarnus di taddert n Ḥura, tafaska Tament di taddert n Waḥriq, tafaska n Tiḥudedda n taddert n Iḥaṭussen, akken daγen id-tettheggi yal seggas tddukla tadelsant Tiεwinin n Wizgan tafaska umezgun naγ timliliyin n umezgun di tudder.Rreḥba tis snat n tfaska n ubernus s usentel» Abernus Iseγ d Trugza», id-sudes tiddukla tadelsant Yakoubi Ferhat n taddert n Ḥura taγiwant n Wizgan s lemεawna n tesqamut n taddert-agi, Tidddukla n tmetti ASSA, tamahla n yedles n lwilaya n Tizi-Wezzu, asqamu aγarfan n ugarzu n Tizi-Wezzu d tγiwant n Wizgan, d tin id-yellan s wudem unsib ass n 11 almi d 13 yunyu ideg nella, d leqdic i yeddan γef teγzi n 03 n wussan, anda ijarden yiwen n wahil d amesbaγur, ideg llant temzikniyin γemgaraden γef ubernus d wamek id-yettili uẓeṭṭa-ines, taqendurt n leqbayel, tallaγt, iẓeḍwan, taklut, Tiḥudeda, allalen iqburen, asenεet n zwağ aqbur, ccna n tmedyazt n tlawin, uraren, taγuri n tmedyazdt, amezgun d waṭas niḍen. Timzizelt γef wexxam leqbayel aqbur. Akken itella d tagnitt yelhan i wid iḥemlen taγuri d tẓuri, imi llan yemyura, imedyazen, imazragen i yellan deg tfaska-agizenzen idlisen-nsen s ibuddan.
Leqdic d win γezzifen imi id-llan isaragen yemgaraden γef umezruy n ubarnus d wazal yesεa di tmetti n wass-a d temnaḍt n leqbayel sumata. Nnig n 25 n yimzikniyen id-yussan si temnaḍin yemgaraden n tmurt leqbayel, ukkan deg leqdic-agi, akken id-tella tmaγra-agi ubernus s leḥdur n deqs n yinebgawen ger-asen; aεeggal n wegraw n luma mass Mussa Tamadartaza, iεeggalen n wesqamu aγarfan n ugarzu n Tizi-wezzu, timahliwen yemgaraden ama, n texamt n lḥirfat tiqburin, timarit, idles, addal d yelmeẓyen, aselway n dayra n Wizgan, iselwayen n tγiwanin yemgaraden n lwilaya n Tizi-Wezzu d yemḍebren n yeḥricen yemgaraden.
Akken id-ussan deqs n yinebgawen niḍen si yal tamnaḍt n tmurt leqbayel, imi iswi n tfaska-agi ubernus, akken ad-rren azal i ubernus n sser d lḥerma, imi abernus d azamul u d tigemmi n leqbayel, u d tagnit yelhan i usebγes uẓeṭṭa ubernus akken ad-yeqqim i lebda.
Syen tiddukla tadelsant Tiεwinin n taddert n At-Wizgan, thegga-d tazrigt tis 02 n temliliyin n umezgun i yebdan ass n 25 yunyu almi d 03 yulyu r id-iteddun, d leqdic ara yeddun γef teγzi n 10 n wussan.
Leqdic-agi yella-d s lemεawna n tesqamut n taddert n Wizgan, taγiwant n Wizgan, timahliwin n yedles akked yelmeẓyen d wadal n lwilaya n Tizi-Wezzu, asqamu aγarfan n ugarzu n Tizi-Wezzu akked d wexxam n umezgun Kateb Yacine. Ahil n leqdic d amesbaγur, anda yella usenεet n umezggun s yisental yemgaraden, cnawi, tamedyazt, cḍaḥ aγerfan d waṭas niḍen. Tadwilt n useggas-a tennarni s waṭas γef tin yezrin, imi 12 n trebuεa n umezgun ara d-yassen si 04 lwilayat n tmurt am Tizi-Wezzu, Tubiret, Bgayet d Wahran Iswi n temliliyin-agi, d aseqreb n umezgun γer tudrin n leqbayel d usebγes n yelmeẓyen akken adkecmen s tahri annar-agi n umezgun i yellan d ababat n tẓuri i wesnarni n yedles amaziγ. Akken tella d aγen d tagnit yelhan i twaculin ad-farssent uḍan n remḍan ideg ara temlil tassa d way turew, d uẓeṭṭa n tegmatt d tdukli ger Amaynut n useggas-a d tiddukla tadelsant 07 zzbari n taddert n Iḥaṭṭusen id-iheggan yiwet n tmeγra s wazal-is, tagi d tameγra n Tiḥudedda id-yellan ass n 06 γuct yezrin di taddert n Iḥiṭṭusen s usentel tudert ger tmes d wuzal, anda id-ussan deqs n yemḍebren n lwilaya n Tizi-Wezzau ger-asen Lwali amaynut mas Merad Brahim i yellan d inebgi n lḥerma, akken i tella d tagnit yelhan imi ldin yiwen usalay n tiḥudedda ideg jemεen merra allalen iqburen swayes xedmen, akken lḥirfa-agi ad teqqim i lebda d azamul n taddert n Iḥiṭṭusen. Akken id tettheggi tdukla tadelsant Sliman At-Uεebbas n taddert Aḥriq tazigt tis 03 n tmeγra n tament d tzizwa ara d-yillin ussan n 15, 16 d 17 γuct 2015, akked tfaska n ukarmus ussan n 20 d 21 deg aggur ideg nella. Mbaεd tazrigt tis 12 n tfaska n ḥkku-d Taẓuri “Raconte-arts», s usentel « Ger yiḍelli d wass-a, aẓar yetabaε tara », id-yellan di taddert n Wagarsafen taγiwant n At-yejar deg ass n 24 almi d 31 γuct γef teγzi n 08 n wussan. Deqs n tfaskiwin niḍen id ittewhegan di tγiwanin yemgaraden n temnaḍt n Wizgan. Am tfaska n tmedyazt tamaziγt » Smaεil Azikkiw », di tezrigt-is tis snat id-tessudes tduukla tadelsant n taddert Tawrirt bwar deg ussan n 06,07 d 08 γuct yezrin, akked tfaska n tmedyazt n wexxam n yedles Aziri Mḥend n tγiwant At-Zikki di tezrigt-is tis 02 ara d-yillin ussan n 27, 28 d 29 γuct d tajmilt i unaẓur meqren i yesnarnin di tezlit n teqbaylit, wagi d Qasi Σebdarahman. Ma yella d taγiwant n Yillulen umalu tella dima di tiεad, imi tger i rebbi i deqs n tfaskiwin, am tmaγra n tbaxsisin, di reḥba tis 09 id-tessudes tdukkla tadelsant Tiγilt n Lemṣella deg ussan n 27, 28 d 29 γuct id-iteddun, tafaska n tqendurt n leqbayel n taddert Yiḥemziyen d tid niḍen. D tagnit yelhan i yemdanen d yinebgawen, xarṣum imnigiyen ad agmen deg yedles lqayen n tmurt leqbayel.
Islam Bessaci