Dayen yessefraḥen aṭaṣ! Anaẓur « awaɣzniw » n cna aẓẓayri s yiles aqbayli, Kamel Ḥamadi, yufrar-d i tikkelt nniḍen deg tafaska tis 8 n yidles akked cna aqbayli i d-yeḍran, seg wass n 9 ɣer 14 deg waggur-agi n Γuct, deg wexxam n yidles n temdint n Bgayet! Tafaska-agi iwumi semman: « Cna n teqbaylit ass-a » d ttin i neǧḥen aṭaṣ. Kamel Ḥamadi, deg yissem-is n tidett Lɛarbi Zeggan, d bab n tfaska-agi seg useggas n 2008, asmi tebda s wuṭun-ines amezwaru. Ayen adenini ɣef D’da Kamel drus, acku, netta mači kan d-anaẓur, maca d-aɣerbaz id yessufɣen aṭaṣ n yinaẓuren yettwasenen. Ɣef aya, tenna-d Massa Salima Gawa, tanemhalt n wexxam n yidles n Bgayet daɣen « ttakumiṣirt n tfaska, ayagi: » D’da Kamel d bab n tfaska-agi i nxeddem myal aseggas seg tazwara-ines i d-yeḍran deg 2008! Anaẓur-agi d tigeǧdit ger tigeǧda n cna aqbayli aẓẓayri! « . Akka ihi, tafaska-agi n cna aqbayli tegla-d s waṭaṣ n yinaẓuren ilemẓyen – ama d ttirbuɛay neɣ iman-nsen- i d-yussan seg lwilayat n Bgayet, Tizi Wezzu, Burǧ Bu Ɛririǧ, Ṣṭif, Leẓẓayer tamanaɣt,Bumerdas lakked Tubirett, akken ad xedmen timezizliyin iwakken ad rebḥen arrazen. Akka, azal n 120 inaẓuren ilemẓyen yewten s wayen sɛan deg taɣuct akken ad d-tbanen ger imezwura. Tafaska-agi tbegned aṭaṣ n yinaẓuren yesɛan tigzi lakked lebɣi akken ad uɣalen d-inaẓuren muqren, ar ay refden asafu n yinaẓuren iqburen, akken ad kemlen abrid nsen, imi nutni tura muqerrit, i wid yedren akka tura. Lukan ad nuɣal ɣer Kamel Ḥamadi, anaẓur-agi yecruruqen am yitri deg yigenni n cna, wagi ur yettwassen ara aṭaṣ ɣer tuttwin-agi timaynutin. Dacu kan, yezga-d d-amedya i wid yebɣan ad ruḥen mebɛid deg cna, neɣ deg myal aḥric n tudert, acku D’da Kamel d-amedya n tigzi, d webrid yessufuɣen ɣer tafat.
Syphax Y.